Өнөөдөр манай улсаас 8 спортын төрөлд хүч сорьж Жюү Жицүгийн төрөлд нэг хүрэл, Чөлөөт бөхийн төрөлд хоёр хүрэл нэг алтан медаль хүртсэн амжилттайгаар өндөрлөлөө. 

  1. Брейк бүжиг 

Брейк бүжгийн спорт Азийн наадам төдийгүй Олимпын наадамд багтсан хамгийн отгон спортын нэг билээ. Олон улсын Олимпын хороо 2021 онд тус төрлийг Олимпын төрөл болгосноор 2024 оны Парисын наадамд анх удаа дэлхийн Брейк бүжигчид олимпын медалийн төлөө өрсөлдөнө. Азийн наадамд ч мөн адил анх удаа зохиогдож буй уг төрөлд манай улсаас Чулуунбаатарын Дөлгөөн, Ганбалтын Ган-Өлзий болон эмэгтэйчүүдийн төрөлд М.Ханджав нар оролцож байна. Улс болгоны шилдэг тамирчид хоорондоо бүжгээр тулалдах ба үзүүлбэрийн гүйцэтгэл, чанар, шинэлэг байдлаас шалтгаалан өрсөлдөгчөө буулган авч үргэлжлүүлнэ. 

Эмэгтэйчүүдийн төрөлд М.Ханджав А группт Вьетнамын тамирчинтай өрсөлдөж 1-1 харьцаатай, дараагаар нь Казакстаны тамирчинтай өрсөлдөж 0-2 харьцаатай, Японы тамирчинтай тулж 0-2 харьцаатайгаар өнөөдрийн бүжгийн тулаан өндөрлөлөө.  

Маргааш 15:00 цагаас Брейк бүжгийн тулаанууд үргэлжилнэ. 

2.    Волейбол 

10:00 цагаас эмэгтэй шигшээ баг Энэтхэгийн багтай 9-12р байрны төлөө тоглож 3 сэт дараалан ялагдаж 11-р байрын төлөө Непалийн төлөө тоглохоор боллоо. 

3.    Жюү Жицү

Өнөөдөр Жюү Жицүгийн дэвжээнд манай зургаан тамирчин өрсөлдлөө

19 дэх удаагийн Азийн наадмын 13 дахь өдрийн тэмцээнүүд эхэлж, Жюү Жицүгийн барилдаан хоёр дахь өдрөө үргэлжилж байна. Өнөөдөр тус дэвжээнд манай зургаан тамирчин өрсөлдлөө. Өнөөдөр манай тамирчдын салхийг хагалж барилдсан Г.Монголжин эмэгтэйчүүдийн 52 кг-ын жинд эхний шатаа хийлж шигшээ 16-д Киргизстаны тамирчинтай барилдан ялагдал хүлээв. Түүний араас Б.Батбаяр 77 кг-ын жинд Филиппины тамирчинтай хүч үзэн 10-0 оноогоор ялалт байгуулсан ч шигшээ 16-д АНЭУ-ын тамирчинд ялагдаж тэмцээнээ өндөрлүүлэв.  Эмэгтэйчүүдийн 52 кг-ын жинд өрсөлдсөн Э.Энхжиндарь мөн эхний шатандаа хийлж, Казакстаны тамирчинтай 16-д өрсөлдсөн ч цэвэр ялагдлаа. Эмэгтэйчүүдийн 57 кг-ын жинд Ц.Удвал эхний шатандаа Энэтхэгийн тамирчинг цэвэр ялж шигшээ наймд Казакстаны тамирчинд идэвхийн оноогоор ялагдан дагах барилдаан шилжив. Улмаар Йорданы тамирчинтай дагах барилдаанд барилдан идэвхийн оноогоор ялагдан тэмцээнээ өндөрлүүллээ. Мөн эмэгтэйчүүдийн 67 кг-ын жинд Э.Шүрэнцэцэг барилдсан ба эхний шатаа хийлж, хоёрдугаар шатанд Сингапурын тамирчинд 3-0 харьцаатай ялагдал хүлээлээ. 

77 кг-ын жинд Б.Батбаяр эхний барилдаанд Филиппины тамирчинтай хүч үзэн 10-0 оноогоор ялалт байгуулсан. Улмаар хоёрдугаар шатанд АНЭУ-ын тамирчинтай барилдан 2-2 болсон ч идэвхийн оноогоор ялагдал хүлээлээ. 

Жюү Жицүгийн төрлөөс анхны хүрэл медалийг 77 кг-ын жинд өрсөлдсөн Мөнхтөрийн Даваадорж Сингапур улсын тамирчин Лим Пол Тиан Жиг цэвэр ялан Азийн наадмын хүрэл медалийн эзэн боллоо.    

Тус жинд өрсөлдсөн Гаруда клубийн тамирчин М.Даваадорж эхний шатанд Кувайтын бөхийг 2-0 оноогоор ялж, шигшээ 16-д Туркменистаны бөхийг 2-0 харьцаатайгаар ялан шигшээ наймд шалгарсан боловч хагас шигшээд шалгарахын төлөө БНСУ-ын тамирчин Коо Бунчолд 0-2 харьцаатай ялагдан дагах барилдаанд шилжиж Узбекистаны тамирчинг идэвхийн оноогоор ялсан юм. Ийнхүү 15:00 цагаас эхэлсэн хүрэл медалийн төлөөх барилдаанд Сингапур улсын тамирчинг цэвэр ялж Жюү Жицүгийн төрлөөс анхны медалийг эх орондоо 

4. Хүндийн өргөлт

МУГТ М.Анхцэцэг бэртлээс болж тэмцээнээ өндөрлүүллээ

Хүндийн өргөлтийн 87 кг-ын жинд өрсөлдсөн МУГТ М.Анхцэцэг өнөөдөр шигшээ шалгаруулалтад оролцлоо. Эхний тойрогт огцом өргөлтөөр эхний 103, 107 кг-ыг өргөж гурав дахь өргөлтдөө 109 захиалсан ч зовуурьтай байсан мөрний бэртлээс шалтгаалж шахаж чадсангүй. Түлхэлттэй өргөлтөөр 134, 136, 138 кг-ууд захиалсан ч өмнөх бэртлээсээ болж түлхэж чадсангүй тэмцээнээ өндөрлүүллээ. Тус жинд Дэлхийн түлхэлттэй болон огцом өргөлтийн гурван удаагийн аварга БНХАУ-ын тамирчин Лианг Шиаомэй түрүүлсэн бол БНСУ-ын хоёр тамирчин удаах байруудыг эзэллээ.   

5.    Чөлөөт бөх

Чөлөөт бөхийн төрөл өнөөдөр Монгол улсын медалийн тоог нэг алт, хоёр хүрэл медаль нэмлээ. 

Тэмцээний салхийг хагалсан С.Цэрэнчимэд 62 кг-ын жинд Казакстаны бөхөд 

6-4 харьцаатай ялагдан эхлүүлэв. Эмэгтэйчүүдийн 76 кг-д манай улсаас Ази тивийн аварга шалгаруулах тэмцээний хүрэл медальт, Үндэсний шигшээ багийн тамирчин Г.Ариунжаргал шилдэг тавд шалгарлаа. Тэрээр Б зоонд эхний тойрогт хийлж, 1/8 шигшээд Казахстаны Жамила  Бекбергеновад ялагдсан. Ийнхүү дагах барилдаанд шилжин Узбекстаны Светлана Окназароватай барилдаж 14-2-оор ялж хүрэл медалийн төлөө Энэтхэгийн Энэтхэгийн тамирчин Кирантай барилдаж 6-3 харьцаатайгаар ялагдаж шилдэг тавд шалгарсан юм.   

Эмэгтэйчүүдийн 68 кг-д U23 насны дэлхийн аварга шалгаруулах тэмцээний хүрэл, залуучуудын дэлхийн аварга шалгаруулах тэмцээний мөнгө, “Белград-2023” дэлхийн аварга шалгаруулах тэмцээний мөнгөн медальт, ЦЕГ-ын Хүч спорт хороо, Үндэсний шигшээ багийн тамирчин Э.Дэлгэрмаа өрсөлдсөн. Тэрбээр хүрэл медалийн төлөөх барилдаанд 2008 оны Бээжингийн олимпын наадмын хүрэл, дэлхийн аварга шалгаруулах тэмцээний 2 хүрэл, 1 мөнгөн медальт Казахстан Елена Шалыгинатай барилдаж 10-6 харьцаатай ялалт байгууллаа. Тэрээр эхний шатанд Вьетнамын Лай Деү Тонгийг 9:0-ээр, хоёрын даваанд Энэтхэгийн Радхикаг оноогоор цэвэр ялсан ч хагас шигшээд Киргизийн Нурзат Нуртаевад 8:10-аар дийлдсэн. Ийнхүү Казакстаны туршлагатай бөх Елена Шалыгинаг ялж хүрэл медалийн индэрт зогсохоор боллоо.

Залуучуудын аваргын хос медальт Нармандахын Насанбуян хүрэл медалийн төлөө, U23 насны дэлхийн аваргын хүрэл медальт Киркизсаны бөх Алмаз Уулу Бекзаттай барилдан 8-2 харьцаатайгаар ялалт байгуулж чөлөөт бөхийн төрөлд дахин нэг медаль нэмлээ. 

Тэрбээр 1/8 шатанд Камбожийн тамирчинг 14-2 харьцаатай ялж, 1/4 шатанд БНАСУ-ын тамирчин Хан Чонсонтой хагас шигшээд өрсөлдөх эрхийн төлөө барилдан 17-6 оноотойгоор ялагдал хүлээн дагах барилдаанд шилжин улмаар эсрэг тамирчин нь оролцохгүй болсноор хүрэл медалийн төлөө Киргизстаны тамирчин Алмаз Уулу Бекзатай оноолт таарсан юм.

Өнөөдрийн оргил барилдаан 65 кг-ын жинд бол Т.Тулга чөлөөт бөхийн төрөлд алтан медаль хүртсэн анхны тамирчин боллоо. Эрэгтэйчүүдийн 65 кг-ын жинд өрсөлдсөн ДАШТ-ий хүрэл медальт, 23 хүртэлх насны Азийн аварга Төмөр-Очирын Тулга 1/8 шатанд Камбожийн тамирчин эхний шатаа хийлж гарч ирсэн Еон Буннатай барилдаж мөн цэвэр харьцаатай ялалт байгуулж шигшээ наймд шалгарсан. Хагас шигшээд шалгарахын төлөө БНСУ-ын тамирчин Ким Чансүтай барилдаж илт давуу ялалт байгуулан мөн цэвэр ялсан. Хагас шигшээд БНАСУ-ын тамирчин Ким Кванжин-ыг дахин цэвэр ялан бүх учраандаа цэвэр ялалт байгуулж мөнгөн медалийн болзол хангасан байсан билээ. Ингээд 19:40 цагаас эхэлсэн 65 кг-ын жингийн Алтан медалийн төлөөх барилдаанд Ираны бөх Амоузадхалили Рахманыг цаг дуусахад 1 минут 30 секунд байхад цэвэр ялснаар Азийн наадамд дийлдэшгүй байгаа гэдгээ батлан харууллаа.

 

6. Байт харваа

14:20 цагаас эрэгтэйчүүдийн байт харвааны төрлийн шигшээ наймын тоглолтод Б.Отгонболд, Ж.Гантөгс, Б.Буянхишиг бүрэлдэхүүнтэй манай Энэтхэгийн багтай цэц мэргэнээ сорьж 228-222 онооны харьцаатай 5-4 өөр ялагдал хүлээлээ. 

7. Уран сайхны гимнастик

10:00 цагаас уран сайхны гимнастикийн ганцаарчилсан болон багийн төрөлд оролсон Э.Эрдэнбаяр, Г.Ганзориг, А.Золбаяр, А.Нарангэрэл, нар оролцож багийн дүнгээр 215.570 оноо цуглуулан наймдугаар байрт шалгарлаа. 

8. Софт Теннис

10:00 цагаас эхэлсэн эмэгтэйчүүдийн ганцаарчилсан төрөлд: 

Э.Намуунхүслэн Хятадын тамирчинтай тоглож 0-4 харьцаатай, Б.Чинмөрөн Японы тамирчинтай тоглож 0-4 харьцаатай, Э.Намуунхүслэн Тайландын тамирчинтай тоглож эцсийн мөчид 3-4 харьцаатай тус тус ялагдлаа. 

Тус цагт эхэлсэн эрэгтэй ганцаарчилсан төрөлд

Б.Мөнхтулга- Камбожийн тамирчинтай эн тэнцүү өрсөлдөж эцсийн мөчид 3-4 харьцаатай ялагдав. Түүний дараа БНСУ-ын тамирчинтай тоглож 0-4 харьцаатай, Тайландын тамирчинтай тоглож мөн 0-4 харьцаатай тус тус ялагдал хүлээлээ.  

Тус төрөлд оролцсон Б.Билгүүн бэртлээс болж гурван тоглолт тоглох байснаас оролцож чадсангүй.