АНУ-ын усанд сэлэлтийн тамирчин, өдгөө 27 настай Кэтие Ледеки эмэгтэйчүүдийн 1500 метрийн чөлөөт сэлэлтийн төрөлд алтан медаль хүртлээ. Энэ нь түүний олимпоос хүртэж буй найм дахь алтан медаль юм. Тэрбээр шигшээ уралдаанд мөнгөн медаль хүртсэн тамирчнаас арав гаруй секундийн өмнө барианд орсон. 

Мөн Ледеки 15:30.02 амжилтаар олимпын дээд амжилтыг шинэчлэн тогтоолоо. Эмэгтэйчүүдийн 1500м-ын чөлөөт сэлэлтийн хамгийн шилдэг 20 рекорд Ледекигийн нэр дээр бүртгэгдсэн байдаг. 

Ла Дефэнс цэнгэлдэх дүүрэн түүнийг дэмжиж буй хөгжөөн дэмжигчид орилолдож байлаа. Гарааны дуугаар Кэтие Ледеки усруу шумбан орж хэдхэн секундийн дотор өрсөлдөгчдөөсөө хол салав. Тэргүүллээ улам бүр бататгаж холдсоор нэг мэдэхэд зураглаачийн дуранд зөвхөн Ледеки харагдаж эхэллээ. Бусад тамирчид түүнээс 10 орчим секундийн хойно уралдаж байв. Бусад нь мөнгөн медалийн төлөө өрсөлдөж байгаа мэт л харагдаж байлаа. Ийнхүү Ледеки улам бүр тэргүүлсээр олимпын дээд амжилтыг эвдэхийн сацуу, найм дахь алтан медалиа итгэл төгс авсан юм. 

Өсвөр насандаа 2012 оны Лондонгийн олимпод оролцсон цагаас хойш олимпын наадамд 8 алт 3 мөнгө 1 хүрэл медаль хүртсэн нь АНУ-аас олимпын наадамд хамгийн олон медаль буюу 12 медаль хүртсэн эмэгтэй тамирчидтай тэнцлээ. Түүнтэй ижил амжилтыг усан сэлэлтийн тамирчид болох Натали Кофлин, Женни Томпсон, Дара Торрес нар эзэмшдэг байна. 

Уралдааны дараа Ледеки "Би яг одоо маш их сэтгэл хангалуун байна. Ямар мэдрэмж төрж байгаагаа үгээр хэлж чадахгүй нь. Магадгүй аз жаргал, баяр баясгалан миний дотроос оргилж байгаа байх" хэмээн хэлжээ. 

Араар даллах төрөлд Америкийн олимпын алтан медальт Райан Мерфигээс уралдааны өмнө АНУ-ын усанд сэлэлтийн спортод Ледеки ямар чухал болохыг асуухад:

Мерфи: "Тэр өөрийгөө хэрхэн сайжруулах талаар байнга шахаж байдаг бөгөөд энэ нь манай спортын хувьд маш чухал зүйл. Тэр бол бүх цаг үеийн шилдгүүдийн нэг. Түүнийг манай багт байгаад нь өөрсдийгөө азтайд тооцох хэрэгтэй” гэжээ. Ледеки яг одоо АНУ гэлтгүй дэлхийн усан спорт сонирхогчдод өөрийгөө ямар агуу тамирчин гэдгээ батлан харуулж байна.