NBA-ийн олон жилийн түүхт алдарт Лос Анжелес Лэйкерс баг сүүлийн 13 жилийн хугацаанд зургаан дасгалжуулагчийг ажлаас нь халжээ. Лос Анжелес Лэйкерс багт 5 аварга хүртсэн Фил Жексоноос хойш түүн шиг дасгалжуулагчийг 21-р зуун гарснаас хойш хайсаар ирсэн ба дахин тийм боломж олдоогүй юм. Түүний араас ахлах дасгалжуулагчийн ажлыг хүлээж авсан Майк Браун тус багийн дасгалжуулагч байх ямар их дарамт шахалттай тулгардаг талаар Стивен Жексон, Мэтт Барнс нартай хийсэн “All the Smoke” подкаст дээр дурджээ. 

Браун 2011 онд ажлаа хүлээж авахдаа Фил Жексоныг дагах хэцүү байх болно гэдгийг мэдэж байсан гэнэ. Браун "Би Фил Жексон болон түүний бүх амжилтыг маш их хүндэлдэг. Жексон ямар хэмжээтэй гутал өмсдөгийг мэдэхгүй. Түүний гутлын улыг долоох гэж ирээгүй. Лэйкерс болон тус багт амжилтад хүрэх замд нь туслахын тулд ирсэн. Гэхдээ Лэйкерсийн ахлах дасгалжуулагчид ямар их дарамт байгааг хүлээн зөвшөөрч, тэр дарамтыг даван туулах нь миний бодсоноос өөр зүйл байлаа” гэжээ. 

Өнгөрсөн 13 жилийн хугацаанд зургаан дасгалжуулагч Жексоны үгээр явах гэж оролдсон. Аль нь ч гурваас дээш улирал ажилсангүй. Энэ жил бүтэлгүйтсэн Дарвин Хэм өнгөрсөн ажиллаж байх хугацаандаа 90-74 харьцаатай амжилт үзүүлж, Өрнөд бүсийн финалд шалгарсан ч хоёрхон улирлын дараа ийнхүү ажлаа өгч байна. Өмнөх зургаан хүнээс хоёр нь дараагийн багтаа NBA-ийн оны шилдэг дасгалжуулагчийн шагналыг хүртсэн нь сонирхолтой. Майк Браун өнгөрсөн улиралд Сакраменто Кингс багт, Майк Д'Антони 2018 онд Хьюстон Рокетс багийг дасгалжуулах үедээ тус тус энэхүү шагналыг хүртсэн нь асуудал нь дасгалжуулагчдаа биш гэдгийг нотлох мэт. 

Өнгөрсөн улирлын плей-оффын дараа ерөнхий менежер Роб Пелинка гурав дахь одтой наймаа хийх эсвэл илүү өндөр зэрэглэлийн чөлөөт агентуудыг хөөцөлдөх боломж байсан ч өөрийн чөлөөт агентууд болох Руи Хачимура, Остин Риивс, Д'Анжело Рассел нартай дахин гэрээ байгуулсан. Дарвин Хэм болон түүний багийнхан өнгөрсөн жилийн амжилтаа ахиулна хэмээн найдаж, “Улирлын анхны Цомын тэмцээн”-д түрүүлсэн тул энэ нь боломжтой мэт санагдаж байлаа.

Эцэст нь Л.А плэй-оффын эхний шатанд хожигдож Дэрвин Хэм 5 хоногийн дараа халагдав. Дасгалжуулагчийн арга барилд уусаж, нэг баг удаан тогтвортой амжилт гаргахад олон жилийн систем, арга барил нөлөөлдөг. Лэйкерс багийн 17 удаагийн аварга авсан түүхэн амжилтын 14-ийг нь ердөө гурван дасгалжуулагч авсан түүхтэй. Тэгэхээр тэдэн тууштай, удаан хугацаанд амжилт гаргах шинэ дасгалжуулагч хэрэг болох нь дамжиггүй. Харин гол асуудал нь дасгалжуулагчдаа байна уу, багийн удирдлага, зохицуулалтдаа байна уу гэдгийг ирэх улирлаас дахин харах үлдлээ.