Монголын сагсан бөмбөгийн Үндэсний дээд лигт тоглож буй гадаад тоглогчдыг цувралаар хүргэж байна. Энэ удаа Хасын Хүлэгүүд багийн бүрэлдэхүүнд багтсан Жастин Моссыг онцолж байна. Жастин Мосс 1993 оны зургаадугаар сарын 19-нд АНУ-ын Мичиган Мужийн Детройт хотод төржээ. Жоэл Мосс, Кармен Эванс нарын бага хүү болон мэндэлсэн ба дээрээ Жошуа Эванс хэмээх нэг ахтай. Түүний аав нь гал сөнөөгч, ээж нь сувилагч. Жастин Мосс аврагчийн /Lifguard/ гэрчилгээтэй гэнэ. Спортын бус гэр бүлээс мэндэлсэн тэрбээр Детройт хотноо өсч, багаасаа сагс тоглох сонирхолтой байжээ. 201 см-ын өндөртэй, 109 кг жинтэй, хүчний довтлогчийн байрлалд тоглодог Мосс багадаа видео тоглоом, хөгжим тоглох сонирхолтой байжээ. Мөн багадаа уран зураг зурах сонирхолтой байсан гэнэ. Түүний бие дээрх олон гайхалтай шивээсийг үзэгчид аль хэдийн анзаарсан биз ээ. 

Ахлах сургуулиа Мичиган мужийн Ромулус сургуулийг дүүргэсэн ба тус сургуулийн багтаа 13.8 оноо, 9.3 самбар дунджилж багийн ахлагчийн үүргийг гүйцэтгэж байв. 2011 оны төгсөх улиралдаа 23-2 амжилттайгаар бүсээсээ шалгаран, мужийнхаа шилдэг найман багт нэрлэгдэхэд нь том тус гүйцэтгэж байсан хэмээн тухайн үеийн ахлах дасгалжуулагч Нэйт Оатс онцолж байж. 

Мосс ахлах сургуулиа төгссөний дараа Мичиган мужийн Толедо их сургуульд элсэн, эрэгтэйчүүдийн шигшээ багт нь нэгдээд байлаа. Гэвч тэрбээр зүрхтэй холбоотой “Гипертрофик кардиомиопати” хэмээх өвчинтэй гэж оношлогдож, цээжиндээ гуурс суулгахаар болов. Толедо их сургууль түүнийг шигшээ багтаа тоглуулахаас татгалзаж, харин спортын тэтгэлгээр сургуульдаа үлдэж болно хэмээн санал тавихад Мосс татгалзаж, Индиан Хиллс Коллеж руу шилжсэн байна. Тус сургуульдаа нэг жил тоглосон байна. 2013 онд ахлах сургуулийнх нь дасгалжуулагч Нэйт Оатс Нью-Йорк хотын Буффалогийн их сургуулийн шигшээг дасгалжуулж байсан ба тус сургуульдаа элсэн орохыг урьжээ. 

Үүний үр дүнд Мосс Буффалогийн Бухнууд багт нэгдэж тус Их сургуулийг дүүргэсэн байна. 2015 онд тэрбээр дундад Америкийн оны шилдэг тоглогчоор шалгарч, Ассошиэйтед Пресс агентлагаас шалгаруулдаг Бүх Америкийн хүндэт өргөмжлөлийг авч байв. Мосс тухайн улиралдаа хоёр удаа Дорнод бүсийн долоо хоногийн шилдэг тоглогчоор шалгарсан. Хавар нь ESPN3 суваг орон даяар шууд дамжуулсан “Цэнхэр ба Цагаан” нэртэй шагнал гардуулах ёслолын улирлын “Үнэ цэнтэй тоглогч”-оор шалгарчээ. 

Мэргэжлийн спортын замналаа 2015 онд Канадын үндэсний дээл лигийн “Orangeville A's” багтай эхлүүлэв. Лигт элссэн эхний жилдээ самбараас бөмбөг авалтаар бүх тоглогчдоос 3-р байрт, оноо авалтаар 4-р байрт жагссан ба түүний тоглолт NBA-ийн зарим багуудын хараанд өртөж байв. 

2016 оны зургаадугаар сард өөр зургаан тоглогчийн хамт NBA-ийн драфтад нэрээ өгсөнөөр Филадельфиа 76 баг тэднийг бэлтгэлдээ урьж байв. Харамсалтай нь 2016 оны драфтад сонгогдож чадалгүй эргэн Orangeville A's багтаа нэгдсэн байна. 2016 оноос хойш Канад, Франц, Мексик, Ирак, АНУ зэрэг орнуудын 10 гаруй багт тоглосон ба тэрбээр одоо Монгол улсын Үндэсний Дээд лигт тоглож байна. Түүний нэгдсэн Хасын Хүлэгүүд баг хагас шигшээд Эрдэнэт Майнерстай учраа таарч, цувралын харьцаа 1:1 харьцаатай эн тэнцүү өрсөлдөж байгаа билээ.