Францын тамирчин Тедди Ринер өнгөрсөн баасан гарагт өөрийн төрөлх Парис хотод +100кг-ын жинд алтан медаль хүртэж олимпын дөрвөн алтан медаль, хоёр хүрэл медальтай олимпод хамгийн олон медаль хүртсэн анхны жүдоч болж олимпын түүхэнд нэрээ мөнхөллөө.

Харин мөнгөн медалийг Өмнөд Солонгосын тамирчин Ким Мин Жонг авсан бол Тажикстаны тамирчин Темур Рахимов, Узбекистаны тамирчин Алишер Юсупов нар хүрэл медалийн эзэд болсон.

Өдгөө 35 настай дэлхийн 11 удаагийн аварга, олимпын дөрвөн алт, гурван хувийн алтан медаль, нэг багийн төрлийн алтан медаль, хоёр олимпын хүрэл медальтай Ринэр нь Францын хамгийн алдартай спортын супер од, үндэсний "теди" (бамбарууш) гэгддэг хүчтэн бөгөөд олон жилийн турш жүдо бөхийн тэмцээнд өрсөлдөж хүч чадал мэргэн ухаанаараа илүүрхэж ирсэн.

Францын Карибын тэнгисийн Гваделуп аралд төрсөн тэрээр Парист өсж тэндээ жүдо бөхөөр хичээллэн сургуульд сурчээ.

Дөнгөж 18 настай байхдаа жүдо бөхийн хамгийн залуу дэлхийн аварга болж байсан тэрээр нийт 11 удаагийн дэлхийн аварга болж, Бээжин-2008 олимпын наадамд +100кг-ын жинд өрсөлдөн анхны олимпоос хүрэл медаль Лондон-2012, Рио-2016 олимпод дээрх төрлөөр өрсөлдөн алтан медалийг дарааллан авсан. Харин Токио-2020 олимпод Оросын жүдоч Тамерлан Башаевт ялагдсанаар 100кг-ын жинд хүрэл медаль, холимог багийн төрөлд алтан медаль хүртсэн.

"Би хамгийн олон олимпын медальтай тамирчны хүснэгтийг тэргүүлмээр байна" гэж дурдаж байсан тэрбээр өдгөө тэр зорилгоо биелүүлэн олимпын хамгийн олон медальтай жүдоч болж өсвөр насны хүүхдээс дийлдэшгүй ахмад дайчин болтлоо жүдогийн ертөнцөд тэргүүлж байна.

Жүдо бөхийн Олимпын түүхэнд энэхүү амжилтыг хамгийн анх Японы нэрт тамирчин Тадахиро Номура хүртсэн бөгөөд тэрээр 1996, 2000, 2004 онуудад гурван удаагийн олимпын аварга болж олимпоос хамгийн олон удаа алт авсан тамирчин болж байсан.

Тедди Ринэр "Өөрийн талбай дээрээ олимпын алтан медаль авах нь юу юунаас илүү чухал байсан" гэж The Guardion сэтгүүлд өгсөн ярилцлагадаа дурджээ.

Харин энэхүү том хүсэл, зорилго нь биеллээ олж өөрийн талбай дээр хүртсэн анхны алтан медаль гэдгээрээ ард түмэндээ итгэл найдварыг авчирч улсынхаа бэлгэдэл болж байгаа юм. Жүдо бөхийг "Чадварлаг хүмүүст зориулсан бүжиг" гэж нэрлэсэн дасгалжуулагчийнхаа хэлсэн үгийг иш татах дуртай тэрээр өндөр, жинтэй хэдий ч уян хатан, хөлд хөнгөн, бэлтгэлийн үеэр хурдан спринт хийж чаддаг, гүйлтийн тамирчинтай илүү төстэй гэдгээрээ алдартай.

Дэлхийн жүдо бөхийн тэргүүлэгч орнуудын нэг Франц улс холимог багийн тэмцээнтэй хэвээр байгаа бөгөөд Токиод болсон холимог багийн тэмцээнд өрсөлдөгч Японыг буулган авсан Францын баг энэ төрөлд хоёр дахь дараалсан алтаа авахаар найдвар тээн хүлээж байна.