5-р сарын 8-нд Олимпын бамбар Францад ирэхтэй зэрэгцэн далай тэнгисийн томоохон парад болно гэж Марсель хотоос мэдэгдэв. Марсель хот Газар дундын тэнгисийг гатлах бамбарыг олон тооны бүртгэлтэй завь дагуулан угтан авахаар болжээ.

Оролцох хүсэлтэй завьнууд 4-р сарын дунд үе хүртэл Олимпын бамбарын маршрутын цахим хуудсанд бүртгүүлж, Газар дундын тэнгист Олимпизмийн үнэ цэнийг мэдрэх боломжтой болно. Арга хэмжээ таван цаг орчим үргэлжлэх бөгөөд 1024 завиар хязгаарлагдах учир 15 хүртэлх хоногийн өмнө бүртгүүлэх боломжтой.

Газар дундын тэнгисийн дэд адмирал Гиллес Бойдевези "Энэ арга хэмжээ нь усан дээр олон хүн парадыг үзэж байгаа баярын арга хэмжээ зохион байгуулах зорилгото. Гэхдээ аюулгүй байдал нь хамгийн чухал" гэж хэлжээ. Газар дундын тэнгист 2022 онд завь хөмөрч, хоёр хүн нас барсныг мөн сануулжээ.

Олимпын парадад оролцох завь нь мэдээжийн хэрэг тодорхой шалгуурыг хангасан байх ёстой. Үүнд : хамгийн ихдээ 250 морины хүчтэй, уртдаа 24 метр урт моторт завь байх ёстой.

1936 оноос хойш зохиогдсон олимпын наадмын тухайд Грекийн Олимпиа дахь Хера сүмийн эртний дурсгалт газарт олимпын дөлийг асааж, бамбарыг өртөөлүүлж эхлүүлэх болно. Олимпын бамбар Францын нутаг дэвсгэрээр аялах аялалаа өмнөд хэсгийн Марсель, Буш-ду-Рон хотоос эхлүүлж, Парис руу чиглэн явах замаа үргэлжлүүлэх юм.  Парис дахь Олимп, Паралимпийн наадмыг зохион байгуулах хорооноос мэдээлснээр “Олимпын бамбарыг Грект эртний Олимпын дурсгалт газарт асаасны дараа гурван тулгуурт “Белем” хэмээх сүрлэг хөлөг онгоцоор Марсель хотод авчрах гэнэ. Марсель хотын эрэг дээр олон нийтийн томоохон наадмыг эхлүүлэхээр төлөвлөжээ.