Парисын олимпыг зохион байгуулах хорооны ерөнхийлөгч Тони Эстангуетийн албан тушаалын цалингийн талаар шүүхээр шалгагдаж эхэлсэн билээ. Тэгвэл лхагва гарагт шинэ сонирхолтой мэдээлэл гарч ирсэн байна. Тодруулбал, Францын шүүхийн байгууллага санхүүгийн гэмт хэргийн чиглэлээр мэргэшсэн шүүгчид өнгөрсөн долоо хоногт Тони Эстангует зохион байгуулах хорооны даргаар ажиллаж байхдаа цалингаа хэрхэн авч байгааг шалгаж эхэлсэн гэж AFP мэдээлсэн юм. Тони Эстангует татвар, урамшууллын дагуу өмнөх жилийн 270,000 евро буюу 290,000 доллар цалинтай байсан бөгөөд энэ цалингийн тоо бараг хоёр дахин нэмэгдээд байгаа аж. Хэдийгээр Эстангуетийн цалин өндөр мэт санагдаж болох ч энэ нь 10 гаруй жилийн өмнө Лондон 2012 наадмын зохион байгуулагчаар ажилласан Себастьян Коегийн 360,000 фунт стерлингийн цалин авч байснаас бага юм. 

Өнгөрсөн 10-р сард "Le Canard Enchaine" хэмээх эрэн сурвалжлах сонинд мэдээлснээр Эстангует цалин авахын оронд өөрийн компанийг ашиглан зохион байгуулах хорооноос сар бүр төлбөр тооцоо хийдэг байжээ. Хорооны хэвлэлийн төлөөлөгч мөрдөн байцаалтад "гайхаж" байгаагаа хэлээд байгууллагуудад тогтоосон цалингийн хязгаарлалтыг тойрч гарахын тулд Эстангуетийг хөндлөнгийн зөвлөхөөр цалинжуулсан гэдгийг үгүйсгэжээ.

Харин энэхүү багц зохицуулалтыг Удирдах зөвлөл, эдийн засгийн яам баталсан гэж хэвлэлийн төлөөлөгч хэлээд Эстангуетийг одоо олимпыг зохион байгуулах хорооны ерөнхийлөгч болж, олон нийтийн нүүр царай болж байгаа гэдгийг сануулав. Үүний зэрэгцээ Парисын санхүүгийн гэмт хэрэгтэй тэмцэх газар AFP агентлагтай холбогдоход тайлбар өгөхөөс татгалзсан байна.

Парисын зохион байгуулах хороо хэдийнэ төсвийн хөрөнгийг зүй бусаар ашигласан, гэрээ байгуулахдаа ашиг хонжоо хайсан байж болзошгүй гэсэн гурван тусдаа мөрдөн байцаалтын объект байгаа гэж AFP мэдээлэв. Тус хорооны оффисууд болон наадмын дэд бүтцийн бүлэг болох Солидео, зохион байгуулах хорооны өөр хоёр ахлах ажилтан Этьен Тобой, Эдуард Доннелли нарын гэрт цагдаа нар нэгжлэг хийсэн байна.

Энэ асуудлын дагуу Парис 2024 зохион байгуулах хороонд ажиллаж эхлэхээс өмнө тус наадамд ахлах ажилтан байсан хүмүүсийн байгуулсан спортын менежмент эсвэл арга хэмжээний компаниудтай холбоотой хэрэг гарч байна. Хэдэн арван сая еврогийн үнэ бүхий 20 орчим өөр гэрээг шалгаж байгаа гэж шүүхийн эх сурвалж нэрээ нууцлахыг хүссэн AFP агентлагт мэдэгджээ.  Францын авлигатай тэмцэх газар зохион байгуулах хороо нь буяны байгууллагын статустай тул 2021 оны тайланд Эстангуетийн цалингийн зохицуулалттай холбоотой байж болзошгүй гажуудлыг онцлон тэмдэглэжээ.