Жүдо бөхийн спортоор 2011 хойш хичээллэж эхэлсэн. Багаасаа хөдөлгөөнтэй, цовоо сэргэлэн хүүхэд байсан. Хашаа, байшин дээр авираад гарчихдаг нэлээн хөдөлгөөнтэй хүүхэд байсан. Дугуй унах дуртай хүүхэд байсан. Спортын төв ордонд анх Шийрэв багшийн шавь болж жүдогоор хичээллэж эхэлсэн. Жүдогийн спортоор хичээллэх тусам сүүлийн үед барилдах дуртайгаа улам бүр мэдэрч байгаа. Барилдаад гоё мэх техникээр хүнээс үнэлгээ аваад, гоё мэхээр ялах нь үнэхээр кайфтай, аз жаргалтай бэлэглэдэг юм байна гэдгийг мэдрээд илүү дуртай болсон.

Чөлөөт цагаараа мотоцикл, цахилгаан дугуй унах дуртай.

Ташкентад болсон дэлхийн аварга шалгаруулах тэмцээн маш халуун, дулаан байсан. Азид болсон болохоор цагийн зөрүүгийн хувьд ч хол биш, таатай байсан. Тэмцээний өмнө нь Батсүмбэрт “Champions” кэмпэд бэлтгэлээ сайн хийж, багш нар зөвлөж байсан. Өрсөлдөгчдөө судлах бүх зүйлээ нэгдсэн бэлтгэлд гарсан байхдаа бүгдийг нь давтаад бэлдсэн байсан. Дэлхийн медальтан болох үед шууд уйлсан. Өөртөө итгэж чадаагүй. Хэрвээ энэ тамирчныг ялчихвал дэлхийн медальтан болно гэдгийг бодоод гарсан. Ялчхаад дэлхийгээс медаль хүртлээ гэдгээ мэдрэх мэдрэмж үнэхээр төгс байсан. Тамирчин болсны оргил мэдрэмжүүдийг авсан. Одоо энэнээсээ илүү өшөө цаашдаа ахиулна.

Солонгос хоолонд дуртай. Бяслагтай чикенд дуртай. Монгол хоолноос гэвэл цуйван, хуушуур, буузанд дуртай.

Гаргасан онцлох амжилтууд гэвэл 2022 оны ДАШТ-ий хүрэл медаль, 2018 оны залуучуудын ДАШТ-ий мөнгөн медаль, Парис, Дюссельдорф, Абу Даби их дуулга тэмцээнүүдийн хүрэл медалиуд мөн Ази тивийн аварга шалгаруулах тэмцээнээс хүрэл медаль хүртэж байсан. 2022 оны Улаанбаатар гранд слам тэмцээний алтан медаль, 2016 оны Чингис Хаан гранпри тэмцээний алтан медальтай. Цаашдын зорилго гэвэл 2023 оны 5-р сард болох дэлхийн аварга шалгаруулах тэмцээнд өмнөх дэлхийн аваргын тэмцээний амжилтаа ахиулахыг хүсэж байна. Мөн 2024 оны олимпын аварга болохыг хүсэж байна.

Хүнээс үлгэр дуурайлал авдаг гэхээс илүү өөрөө үлгэр дуурайлал үзүүлдэг хүн байхыг бодож, хичээдэг. Бүх юманд чин сэтгэлээсээ хандах дуртай. Өөрийн мэддэг, чаддагаа хүмүүст хуваалцаж, тус дэм болох дуртай.

Өвдгөндөө маш хүнд бэртэл аваад тэр үед Японы 66 кг-ийн Маруяама гэдэг тамирчин минийх шиг өвдөгний бэртэлтэй байсан. Бэртлээсээ тэр тамирчин эргэн ирж дэлхийн аварга болсон. Би 2019 оны 8-р сард өвдөгний хагалгаанд орж байлаа. Тухайн үед Маруяама бэртлээсээ эргэн ирж, дэлхийн аварга болж байгааг хараад эрч хүч, урам зориг авч байсан. Энэ хүнээс бэртлээ даван туулсан зан чанарынх нь хувьд үлгэр дуурайлал авсан.

Сэтгэлээр унасан үедээ дуу сонсоод ч юм уу алхдаг. Чив чимээгүй дуугаа хураагаад алхдаг. Тэгж өөрийгөө тайвшруулдаг. Ер нь л их алхдаг. Юу нь болохгүй байсан, яагаад сэтгэлээр унаснаа бодож, учир шалтгаанаа бодож, гаргалгаа олоод өөрийгөө тайвшруулдаг.