"Мөрөөдөл эхэлсэн мөч"

2012 оны наймдугаар сар. Английн Тоттенхэм Хотспур багт амжилттай тоглож байсан даруухан Хорват залууг дэлхийн хамгийн том клубүүдийн нэг болох Испанийн эзэн хааны “Реал Мадрид” албан ёсоор өөрийн болгов. Лука Модрич бол хэзээ ч дуу шуутай, өөрийгөө магтсан тоглогч байгаагүй. Гэвч түүний тоглолтын ухаалаг байдал дамжуулалтын урлаг, хүчтэй сэтгэлзүй, зогсогдошгүй зүтгэл нь Реалын тоглолтын “хөдөлгүүр” болж байв. Тэр Роналдуг гоолд хүргэдэг, Каземиро, Кроосын хамтаар дэлхийн шилдэг хагас хамгаалалтын гурвал болсон.

2018 он: Хамгийн том оргил амжилт

Реалтай Аваргуудын Лигийн 3 дараалсан түрүү авсны дараа Хорватын шигшээ багийг ахалж Дэлхийн аваргын финалд хүргэсэн тэр жилдээ:

·        Ballon d'Or

·        FIFA The Best

·        UEFA Men’s Player of the Year

Тэр бол Роналду, Месси-ийн 10 жилийн ноёрхлыг зогсоож “Дэлхийн шилдэг” болсон.

“Клубийн тоглогчдын хамгийн сайн зөвлөгч ах мөн найз”

13 жилийн хугацаанд Лука зөвхөн тоглоогүй. Тэр өсгөж хүмүүжүүлсэн. Арда Гүлер, Камавинга, Винисиус зэрэг залуус түүнийг “клубийн эцэг” гэж нэрлэдэг. Тэр бол ахлагч байгаагүй ч ахлагчийн үүргийг чимээгүй гүйцэтгэсэн хүн.

Лука Модрич багаасаа явж буй талаараа: “Дууслаа гэж битгий уйл, болсон болохоор инээмсэглэ. Баярлалаа Мадридистууддаа. Та нар намайг өөрсдийн нэгэн болгосонд баярлалаа. Би үргэлж та нарын нэг байх болно. Одоо бол шинэ сорилтын цаг, гэхдээ Мадрид үргэлж миний хувьд гэр минь байх болно.” 

Реал Мадрид клубийн төлөө 13 жил хүчин зүтгэхдээ:

Лука Модрич Реал Мадрид клубийн хамтаар 597 тоглолтод оролцож 43 гоол оруулж 95 гоолын дамжуулалт гүйцэтгэж 28 цом хүртсэн. Европын хамгийн нэр хүндтэй тэмцээн болох Аваргуудын лигт 6 удаа түрүүлж, Испанийн Ла лигт 4 удаа түрүүлж, Клубүүдийн дэлхийн аваргад мөн 6 удаа түрүүлж байсан. Реал Мадрид клубийн ерөнхийлөгч Флорентино Перез түүний талаар “Лука Модрич бол түүх, харин түүх үргэлж хадгалагддаг” гэж хэлсэн нь түүнийг Реал Мадридын төлөө ямар их зүйлийг хийж бүтээснийг үнэлсэн үнэлэмж билээ.

Лука Модрич Реал Мадридын төлөө сүүлчийн тоглолтоо Клубүүдийн дэлхийн аваргын хагас шигшээд Францын ПСЖ клубийн эсрэг хийж 0:4 харьцаатай хожигдсон бөгөөд үүнийхээ дараахан 7-р сарын 14-нд Италийн алдарт Rossoneri хочит AC Milan клубтэй нэгдээд байгаа юм.