Анх сагсан бөмбөгөөр 8-р ангиасаа, 15 настайдаа хичээллэж эхэлсэн. Хамгийн анх Дорноговьд үеийнхэн дундаа өндөр байсан учраас дуудагдаж секцэд хичээллэж байсан. 2008 онд оюутны лигийн шилдэг тоглогч болоод өөрөөрөө бахархаж, одоо л яг сагсан бөмбөгчин боллоо доо гэж бодож байсан. 2014 онд Монгол улсын шигшээ багт сонгогдож, багийн ахлагч болж Инчонд болсон Азийн наадамд оролцож байхдаа баярлаж, бахдаж байсан.

Чөлөөт цагаараа гэртээ кино үзэж, хэвтэх дуртай. Гэртээ амрах, унтах дуртай. Яг одоогоор сагснаас өөр спортыг дурлаж үзэхгүй байна.

“Superpower”-тай байсан бол “Invisible” болж чаддаг байхыг сонгоно. Яагаад ч юм хүнд харагдахгүй хүмүүсийн хажууд байж үзэхийг хүсдэг.

Махан төрлийн бүх хоолонд дуртай. Ер нь л хоолонд их дуртай.

Цаашид бага насны хүүхдүүдэд сагсны суурийг зөв тавья гэж боддог. Цаашдын зорилго дасгалжуулагчийн замналаа хөөж, хүүхэд багачуудад сагсан бөмбөгийг зөв системтэйгээр, анхнаас зөв сургаж, стандартыг бий болгоё гэж зорьж байгаа.

Ээжээсээ хамгийн их үлгэр дуурайлал авдаг. Сагсан бөмбөг, спорттой холбоотойгоор үлгэр дуурайлал авдаг хүмүүс бол Цэвэрбал болон Энхбаатар дасгалжуулагч нар. Мундаг, мундаг багш нараасаа үлгэр дуурайлал авдаг.

Сэтгэлээр унасан үедээ унтахыг хичээдэг. Хурдан унтаж, хангалттай сайн унтаж, өөрт хэрэгтэй энергиэ авбал сэтгэл санаа өргөгддөг юм шиг санагддаг.

Сагсан бөмбөгөө орхиогүй тууштай хичээллэсэн нь хамгийн зөв шийдвэр гэж боддог. Амьдралд олон сонголтууд гарч ирдэг ч сагсаа орхилгүй, хичээллэж, амьдралынхаа томоохон хэсэг болгосоор ирсэн нь зөв байсан гэж боддог. Сагсан бөмбөгийн эмэгтэй шигшээ багийн дасгалжуулагч болсон нь энэ хүртэл олон мундаг багш нараас сурч, мэдсэн зүйлээ хойч үе, хүүхдүүдэд заах болсон нь сайхан санагдаж байгаа. Нөгөө талаараа хариуцлага гэж хүлээж авч байгаа. Дасгалжуулагч болоод шавь нар маань амжилтад хүрч, өсөж дэвжиж байгааг нь харах сэтгэлд сайхан байдаг гэж бодож байна.