Дэлхийн хөнгөн атлетикийн холбооноос жил бүр уламжлал болгон тодруулдаг оны шилдэг хөнгөн атлетикийн шагналын эздийг өчигдөр Монако хотноо тодрууллаа. Эрэгтэй шилдэг тамирчнаар АНУ-ын тамирчин Ноа Лайлс, эмэгтэй шилдэг тамирчнаар Кенийн тамирчин Фэйт Кипьегон нар тодорсон байна. 

Дэлхийн хөнгөн атлетикийн холбооны ерөнхийлөгч Себастьян Кое "Энэ жил манай спортын цар хүрээ, гайхалтай шинэ амжилтууд болон тамирчдын авьяас чадвар улам бүр өргөжсөн бахадмаар жил байлаа. Энэ оны шилдэг тамирчдаар тодорсон залуус маань л гэхэд 2023 онд дэлхийн долоон дээд амжилтыг тогтоож, олон тооны дэлхийн аваргын цол болон томоохон ялалтуудыг байгуулсан тул өөр өөрсдийн салбартаа оны шилдэг тамирчнаар шалгарсан нь нүдээ олсон шагнал гэж бодож байна” хэмээн хэвлэлийнхэнд өгсөн ярилцлагадаа дурдав. 

Фэйт Кипьегон 2023 онд 1500, 5000 метрийн дэлхийн дээд амжилтыг шинэчлэн тогтоож, 2023 оны хөнгөн атлетикийн дэлхийн аварга шалгаруулах тэмцээний хоёр зайд алтан медаль хүртсэн. 

Ноа Лайлс 2023 онд 100 ба 200 метрийн зайн ганцаарчилсан төрөлд дэлхийн аварга болж, 4х100 метрийн буухиа тэмцээнд АНУ-ын баг түрүүлэхэд үнэтэй хувь нэмэр оруулж, энэхүү амжилтаараа нийт гурван алтан медалийг өөрийн нэр дээр бичүүлсэн байна. 

Ялагчдыг Дэлхийн хөнгөн атлетикийн зөвлөл (50%), Дэлхийн хөнгөн атлетикийн гэр бүл (25%) болон олон нийтийн гишүүдийн саналыг (25%) тусгасан санал хураалтын дүнгээр тодруулсан байна.