Би-Би-Си агентлагаас жил бүр тодруулдаг оны шилдгүүдээс “Спортын шилдэг од” төрөлд Манчестер Сити багийн супер од, Норвегийн тамирчин Эрлинг Хааланд ялалт байгуулж, энэ оны Дэлхийн спортод хамгийн тодоор гялалзсан тамирчнаар шалгарлаа. Өдгөө 23 настай хөлбөмбөмгийн супер од оролцсон тэмцээнүүддээ нийт 52 гоол оруулсан ба Манчестер Сити баг 2022-2023 оны улиралд Премьер лиг, Аваргуудын лиг, Холбооны цомын тэмцээнүүдэд түрүүлсэн бахдам амжилт үзүүлэхэд түүний нөлөө их байсан билээ. Энэ улиралд Премьер лигт хамгийн олон гоол оруулсан буюу 38 тоглолтод 36 гоол оруулж, Премьер лигийн "Алтан шаахай" цолыг хүртсэн. 

Тухайн шагналыг тодруулахдаа Би-Би-Си агентлаг уншигчдын санал хураалтаас гадна сэтгүүлчдийн саналыг үндэслэн энэхүү шагналыг тодруулсан байна. Шагналаа хүртсэний дараа Эрлинг Хааланд "Надад санал өгсөн бүх хүмүүст баярлалаа. Өнгөрсөн жил үнэхээр гайхалтай байлаа. Би болон манай баг гурав дараалж аварга хүртсэн, бидний гайхалтай амжилт үзүүлсэн нь энэ шагналыг авахад нөлөөлсөн байх, бүх шүтэн бишрэгчдэдээ хайртай шүү" хэмээн сэтгэгдлээсээ хуваалцлаа. 

Хоёрдугаар байрт Өмнөд Африкийн регбигийн аварга Сия Колиси, Гуравдугаар байрт Формула 1-ийн дэлхийн гурван удаагийн аварга Макс Верстаппен нар тодорсон байна. Мөн шагналт байруудад олимпын гимнастикийн дөрвөн удаагийн аварга Симон Байлс, Испанийн дэлхийн цомын аварга Айтана Бонмати, “Их дуулга”-ын 24 удаагийн аварга Новак Жокович нар шалгарчээ