Спорт холбоодуудын энэ оны сүүлийн тэмцээнүүд энэ сард зохиогдож байна. Тэгвэл ямар ямар спортын уралдаан тэмцээнүүд энэ сард зохиогдохыг дэлгэрэнгүй хүргэж байна. 12-р сарын 02-03 ны өдрүүдэд Японы Токио хотод “Токиогийн Их дуулга” тэмцээн зохиогдоно. Тус тэмцээнд манай улсаас 21 жүдоч өрсөлдөхөөр болсон байна. Баг тамирчид өмнө нь 14 хоног Япон улсын Кокушикан их сургууль, Нихон их сургууль, Токай их сургуулиудад шигшээ багийн дасгалжуулагч Ч.Болдбаатар, М.Бундмаа нарын удирдлага дор хамтарсан бэлтгэлд хамрагдаад байсан билээ.

Монголын Боксын Холбооноос зохион байгуулдаг “Насанд хүрэгчдийн боксын улсын аварга шалгаруулах” тэмцээн 12-р сарын 04-нөөс 09-ний өдрүүдэд зохиогдоно. Тус тэмцээн спортын төв ордны А зааланд болох бөгөөд тус тэмцээнээс медаль хүртсэн эрэгтэй 7, эмэгтэй 6 тамирчин олимпын 13 жинд өрсөлдөх эрхээ авах юм. 

Олимпын таеквондогийн Монгол улсын аварга шалгаруулах тэмцээн энэ сарын 18-19 өдрүүдэд зохиогдоно. Тэмцээн насанд хүрэгчид, мастер, паратаеквондо зэрэг ангиллуудаар явагдах бөгөөд Спортын төв ордны А зааланд зохиогдохоор болжээ. 

2024 онд БНСУ-д зохион байгуулагдах Зүүн Азийн Хөлбөмбөгийн Холбооны Эмэгтэйчүүдийн аварга шалгаруулах тэмцээний урьдчилсан шатны тоглолтууд Макао болон БНХАУ-ын Жухай хотуудад үргэлжлэн явагдана. 12-р сарын 02-нд БНАСАУ-ын эсрэг 16:00 цагт, 12-р сарын 04-нд Хонгконгийн шигшээ багийн эсрэг 13:00 цагт тус тус тоглох юм. 

Монголын усанд сэлэлтийн Мастерсын дундын зайн тэмцээн 12-р сарын 9-ны өдөр зохиогдоно. Мастерс ангиллын дундын зайн анхдугаар гэх тодотголтой тус тэмцээн Баянгол дүүргийн усан спорт сургалтын төвд зохиогдоно. 

Энэ оны сагсан бөмбөгийн 3х3-ын финалын тэмцээн 12-р сарын 08-09-ний өдрүүдэд Саудын Арабын Жедда хотод зохиогдоно. Манай улсаас "Улаанбаатар ММС" баг өрсөлдөх ба В зоонд Миами, Партизан багуудтай учраа таарсан байна. Тус тэмцээнд энэ онд зохиогдсон дэлхийн аялан тоглолтууд болон, Мастерс тэмцээнүүдэд ялалт байгуулсан шилдэг 14 баг өрсөлдөх юм.