Авто мото спортын олимп гэгддэг Дакар Ралли уралдаан энэ жил Саудын Араб улсад зохион байгуулагдаж байгаа билээ.  Энэ жилийн өрсөлдөөн Дакарын 46 дахь удаагийн тэмцээн бөгөөд Саудын Араб 5 дахь удаагаа уралдааныг зохион байгуулж байна. Нэгдүгээр сарын 5-наас 19-ний хооронд болж байгаа тэмцээн нь олон бартаат зам, саад бэрхшээл, эр зоригийг шаарддаг учраас бариандаа орох нь оролцогчдын хувьд том амжилт болдог. Энэ жилд нэгэн эмгэнэлт явдал болж, Испанийн мотоцикльчин Карлес Фалкон Дакар раллид оролцож байхдаа осолд орж, нас барсан тухай уралдааны зохион байгуулагчид Даваа гарагт мэдэгдлээ. 

Дакар ралли зохион байгуулагчид хуучнаар X хуудсаараа дамжуулан "Испанийн уралдаанч Карлес Фалкон нас барсан тухай гэр бүлээс нь мэдээд маш их харамсаж байна" гэж мэдэгджээ.

Мэдэгдэлд: "Дакар раллигийн зохион байгуулагчид болон өрсөлдөгчид түүний гэр бүл, найз нөхөддөө гүн эмгэнэл илэрхийлж байна." Фалкон Саудын Арабын алдарт уралдааны хоёрдугаар шатанд 448 километрийн зайд явж байхдаа осолдож, яаралтай эмнэлгийн тусламж авахаар эмнэлэгт хүргэгдсэн гэв. Түүний харьяалагддаг “Twin Trail Racing” багийнхан даваа гарагт Instagram хуудсандаа “Карлес биднийг орхисон. Эмнэлгийн багийнхан ослын үед зүрх, амьсгалын замын улмаас үүссэн мэдрэлийн гэмтэл нь амь насанд хүрсэн гэдгийг баталсан” гэв.

Тэмцээний зохион байгуулагчдын мэдээлснээр талийгаачийг  Аль Дувадимигийн эмнэлэгт онгоцоор хүргэж, улмаар Эр-Рияд хотын эмнэлэгт шилжүүлсний дараа Испани руу буцаасан байна. Испанийн Таррагона хотод төрсөн Фалкон амьдралынхаа туршид "мотоциклээр хүрээлэгдсэн" байсан гэж багийнхан нь дурджээ. Тэрээр өмнө нь 2022 оны Дакар Раллигийн барианд орж байсан удаатай.

"Карлес үргэлж инээдэг, үргэлж идэвхтэй, хийсэн бүх зүйлээ, ялангуяа мотоцикль дээр гал цогтой байсан" гэж багийнхан нь дурсан ярьжээ. Тэр Дакарт хүсэл мөрөөдлөөрөө уралддаг байсан. Тэр бидэнд үүнийг хийж гүйцээхийг сануулан үлдээлээ. Тэр уралдаанаас таашаал авч байсан, тэр мотоцикль дээрээ баяртай байсан. Бид түүний инээмсэглэл, бусдад бий болгосон аз жаргалыг нь санаж байх ёстой." гэжээ