И-Спортын Валорант тоглоомын дэлхий дахь хамгийн алдартай тоглогчдын нэг Тайсон буюу "TenZ" өөрийн цахим хуудсаараа дамжуулан сэтгэл хөдөлгөм мэдэгдэл хийж, эх спортоо орхихоор шийдсэнээ мэдэгдлээ.

Өнөөдөр “Sentinels” багийн од ирээдүйн төлөвлөгөөгөө илэрхийлсэн сэтгэл хөдөлгөм видеогоор дамжуулан шүтэн бишрэгчидтэйгээ энэ мэдээг хуваалцав. Тэрбээр тус тоглоомын өрсөлдөөнөөс гарч, контент бүтээхээр шийджээ. 

TenZ өөрийн И-спортын карьераа 2017 онд “Counter-Strike”-ын мэргэжлийн тоглогчоор эхлүүлсэн ба 2020 онд “Valorant” тоглоом руу шилжиж, 2024 он гэхэд хамгийн шилдэг тоглогчийн нэг болон хөгжжээ. Тэрбээр "Бид энэ жил тодорхой хэмжээнд амжилт үзүүлж чадсандаа баяртай байна. Энэ амжилтаар миний замнал өндөрлөлөө" хэмээн хэлжээ.

Мэргэжлийн тоглогч байх нь ихээхэн цаг хугацаа, хүчин чармайлт шаарддаг бөгөөд энэ нь түүнийг бүрэн цагийн контент бүтээгч болох зорилгоо биелүүлэхэд нь саад болдог гэж тайлбарлав.

Валорант тоглоомд зарцуулсан дөрвөн жилийн хугацаанд тэрбээр олон улсын хоёр цом хүртэхэд багтаа тусалсан байна.