Азийн 19 дэх удаагийн бага олимп БНХАУ-ын Ханжоу хотод амжилттай зохиогдож, өчигдөр хаалтын ажиллагаа ёслол төгөлдөр боллоо. 14 хоног үргэлжилсэн уг наадамд олон сонирхолтой өрсөлдөөн, олон ривал тоглолт болон нулимс дуслуулсан үйл явдлаар дүүрэн боллоо. 

Өрсөлдөгчийн төлөөх нулимс

Хятадын усан сэлэлтийн од Жан Юфэй зургаан алтан медаль хүртсэнийхээ дараа Ханжоугийн наадамд баяр хөөрөө тэмдэглэхэд хэн ч гайхахгүй байв. Гэвч тэрээр эмэгтэйчүүдийн 50 метрийн эрвээхэй сэлэлтийн төрөлд Японы тамирчин 23 настай хүрэл медаль авсных нь дараа нулимс дуслуулсан юм.

Учир нь Рикако Ики цусны хорт хавдар туссан ба түүний ирээдүйтэй замнал дуусах магадлал ойртож буй. Тэрээр өмнө нь “Жакарта 2018” тэмцээнд зургаан алтан медаль хүртэж дэлхийг гайхшируулж байсан юм. Гэвч тэр өвчний эсрэг зоригтой тэмцэж, усан спортоо орхилгүй тэмцсээр хүрэл медаль хүртэв. Энэ оны эхээр болсон дэлхийн аварга шалгаруулах тэмцээнд Хятадын Жан Юфэй Рикако Ики-д  хандан "Өөртөө хамгийн сайн нь бай" гэж алган дээрээ бичсэн үгийг харуулсан. Ханжоу хотод түүний өрсөлдөгч найз нь усан санд өөрийн чадвараа дахин харуулахыг хараад нулимс цийлгэнүүлсэн Жан Юфэй гүйн очиж түүнийг тэврэн чин сэтгэлийн баяр хүргэв.

Наадмын бэлгэдлийн тогоог асааж буй дижитал бамбар баригч

9-р сарын 23-нд болсон Азийн наадмын нээлтийн ёслолын үеэр анх удаа дижитал бамбар баригч тогоог асаах ёслолд оролцсон. Хятадын технологийн төв гэгддэг Ханжоу Азийн наадмыг техникийн дэвшилтэд байдал дээр тулгуурлана гэдгээ нээлтийн өдрөөс л харуулж эхлэв. Нээлтийн ёслолын үеэр эдгээр бамбарыг бэлгэдсэн дижитал хөдөлгөөнт дүрс Хятадын усанд сэлэлтийн олимпын аварга Ван Шунтай зэрэгцэн долгион хэлбэртэй тогоо бадраахын өмнө Ханжоу хотод байрлах Цянтан голыг гаталсан юм.

Нас бол тоо гэдгийг баталсан домогт тамирчинд зориулсан алга ташилт

“Домогт” гэж хэлж болох тамирчдын тухай ярианд Узбекистаны Оксана Чусовитина яах аргагүй багтана. Өдгөө 48 настай тэрбээр Азийн наадмаас найман медаль хүртсэний хоёр нь алт. 1992 онд тэрээр хуучин ЗХУ-ын Нэгдсэн багийг төлөөлөн Олимпод оролцож, эмэгтэйчүүдийн алтан медаль хүртэж байжээ.

2002 онд Чусовитинагийн хүү цусны хорт хавдартай болох нь тогтоогдсон үед тэрээр илүү өндөр орлоготой болж, илүү сайн эмчилгээ хийлгэхийн тулд дэлхийн хэмжээний арга хэмжээнд оролцохоор Германы иргэншил авчээ. Хүү нь эдгэрсэн тул Чусовитина энэ спортод дурласандаа гимнастикийн аяллаа үргэлжлүүлж байна.

Тэрээр хэдийгээр Ханжоу хотноо эмэгтэйчүүдийн тавцан дээрх гимнастикийн төрөлд ердөө 0.15 онооны зөрүүгээр медаль авах боломжгүй болсон ч үзэгчид нижигнэсэн алга ташилтаар угтан түүнийг хүндэтгэсэн юм. 

Насан өөд болсон дасгалжуулагчтайгаа ялалтаа хуваалцав

Ханжоугийн Азийн наадмын эмэгтэйчүүдийн 100 метрийн зайд түрүүлснийхээ дараа Хятадын хурдан гүйлтийн тамирчин Гэ Манчи дээшээ харан амандаа "Харсан уу? Би чадлаа" хэмээн нулимс дуслуулан бувтнав. Тэрээр медалиа талийгаач дасгалжуулагч Лю Жаошүд зориулжээ.

25 настай Гэ-г 13 настайгаасаа эхлэн "Эцгээс өөрцгүй" гэж үздэг Лю багш дасгалжуулж түүнийг бүхий л цаг үед дагалдан явж, сургаж байжээ. Лю өнгөрсөн 11-р сард өвчний улмаас нас барсан ч Гэ Манчи Азиас алт авна гэсэн амлалтаа санасан хэвээр энэхүү тэмцээнд оролцсон байна. Тэмцээний дараа цэнгэлдэх хүрээлэнд эгшиглэсэн "Шөнийн тэнгэр дэх хамгийн тод од" дуу нь "Намайг шөнийн харанхуйд төөрөх болгонд чи миний урд замыг гэрэлтүүлдэг" гэж тэдний сэтгэлийг хамгийн сайн дүрсэлсэн юм. 

Хожигдсон ч гэлээ хамгийн том ялалтаа авсан нь

Афганистаны тоглогчид регбигийн спортод дуртай ч барилгын ажилчдаас эхлээд жолооч хүртэл янз бүрийн мэргэжил эзэмшсэн. Тэд албан ёсны ивээн тэтгэлэггүйгээр Ханжоу руу хийх зардлаа өөрсдөө санхүүжүүлж, тоглолт болохоос ердөө тавхан хоногийн өмнө ирсэн байж. Тоглолт эхэлж Афганистаны Регбигийн баг Азийн дэвжээнд өрсөлдөгчөө буулган авч, онооны самбар 16-хан минутын дотор 52:0-ийн харьцаатай дуусахыг үзэгч дэмжигчид бүгд харлаа. Анх удаа оролцож буй тэд энэхүү төрөлд хэдийгээр 12-р байр эзэлсэн ч тэдний хувьд Азийн дэвжээнд гарсан нь өөрөө ялалт байсан юм.

Багийн ахлагч Омар Слайманхел “Афганистан сүүлийн 40-50 жилийн хугацаанд маш их бэрхшээлийг туулсан. Бид эх орныхоо бахархлыг үргэлжлүүлж чадна гэж найдаж байна" гэжээ.