УЕФА Израиль дахь аюулгүй байдлын нөхцөл байдлын улмаас дараагийн мэдэгдэл хүртлээ ямар ч тоглолт хийхгүй гэдгийг батлажээ. Уг шийдвэрийг УЕФА-гийн Гүйцэтгэх хороо гаргаж, Израилийн хөлбөмбөгийн холбоо болон түүний баг болох Маккаби Хайфа, Маккаби Тель-Авив клубуудаас энэ хугацаанд гэртээ тоглолт хийх өөр газар, цэнгэлдэх хүрээлэнг санал болгохыг хүссэн байна. УЕФА мөн Маккаби Хайфа болон Маккаби Тель-Авивын Европын дараагийн тоглолтуудыг хойшлуулснаа зарлалаа. Маккаби Хайфагийн Вильярреалтай хийх Европын лигийн хэсгийн тоглолт 12-р сарын 6 хүртэл хойшлогдсон бол Маккаби Тель-Авивын Зоря Лугансктай хийх Европын конференц лигийн хэсгийн тоглолт 11-р сарын 25-нд хойшлогдлоо. Энэ нь 10-р сарын 7-нд алан хядах Хамас бүлэглэл Израиль руу дайралт хийснээр эхэлсэн Израиль, Палестины хооронд хурцадсан мөргөлдөөний хариу арга хэмжээ юм. Хамгийн сүүлийн мэдээгээр Газад амиа алдагсдын тоо 3500 орчим байгаа бол Израильд дор хаяж 1400 хүн амиа алдсан байна. Үүний зэрэгцээ, УЕФА-гийн Гүйцэтгэх хороо Брюссельд болсон террорист халдлагын улмаас даваа гарагт завсарласан Бельги, Шведийн хооронд болсон ЕВРО 2024 тэмцээний урьдчилсан шатны тоглолтыг дахин явуулахгүй байхаар шийдвэрлэлээ. Тоглолт эхлэхээс 45 минутын өмнө болсон Кинг Баудуин цэнгэлдэх хүрээлэнгээс таван километрийн зайд орших Д’Ипр бульварт буудалцаан болж хоёр Шведийн иргэн амиа алдсан.  Маргааш нь Брюссель хотод Тунисын иргэн 45 настай Абдесалем гэгч зэвсэгт этгээдийг цагдаа нар бууджээ.Тоглолт 1:1-ийн харьцаатай зогссон бөгөөд Бельги ЕВРО 2024 тэмцээнд оролцох эрхээ авсан, Швед оролцох боломжгүй тул дахин тоглохгүй гэсэн шийдвэр гаргасан байна. F хэсгийн чансаанд баг бүр нэг оноо авсан билээ.