Дэлхийн ой тогтоолтын спортын холбооноос жил бүр зохиодог “Ой тогтоолтын ДАШТ” БНХАУ-ын Саняа хотод 12-р сарын долооны өдрөөс 10-ны хооронд амжилттай болж өндөрлөлөө. 32 дахь удаагаа зохиогдож буй уг тэмцээнд манай улсаас ОУ-ын шүүгч, Дасгалжуулагч: Б.Баасандорж, Ө.Сэнгэсамдан нараар удирдуулсан 31 тамирчин оролцож дэлхийн тамирчидтай оюун ухаанаа уралдуулсан байна. 

"Нэр, Зүс царай" тогтоох төрөлд манай улсын гурван тамирчин нас, насны ангилалд дэлхийн дээд амжилтыг шинэчлэн тогтоолоо. Тухайлбал насанд хүрэгчдийн ангилалд ОУ-ын Их Мастер, Дэлхийн аварга Т.Тэнүүн 188 нэр, өсвөр насны ангилалд Их Мастер Ц.Оюун-Эрдэнэ 175 нэр, бага насны ангилалд Б.Анужин 99 нэр тогтоож дэлхийн рекордыг өөрсдийн нэр дээр шинэчлэн бичүүлээ. 

Мөн анх удаа дэлхийн аварга шалгаруулах тэмцээнд оролцож буй 14 настай тамирчин О.Наранзул 5500 оноо давуулан биелүүлж ОУ-ын Мастер, Их Мастер цолны болзол хангаж цоо шинэ Их Мастер төрөн гарлаа. Их Мастер цолны болзол нь 10 төрлийн тэмцээний дараах нийлбэр оноогоор 5500 давуулах ёстой бөгөөд тухайн жилдээ хамгийн өндөр оноотой таван тамирчинд олгодог өндөр шалгууртай цол юм.  Энэ жил Их Мастер цолыг манай улсаас гурван тамирчин хүртсэн онцгой жил тохиож байна.