Сүүлийн өдрүүдэд сагсан бөмбөг сонирхогчид, бүхий л хэвлэл мэдээллийн газрууд, дэлхий нийтээрээ NBA-н цомын төлөөх тэмцээнд бүхий л анхаарлаа хандуулж, аварга багийг тодрох мөчийг хүлээж тун завгүй байлаа. Хүсэн хүлээсэн аварга баг нь ч тодорч финалд шалгарсан хоёр багаас бусад 28 багт хоёр хоногийн бүтэн амрах өдөр тохиож өнөөдөр NBA-ийн хүрээнд нэг ч тоглолт болсонгүй.

Одоо л багууд өөрсдийгөө таниж мэдэж плейоффд орохын төлөө өрсөлдөх үү, аль эсвэл уналт хийж ирэх жилийн Күүпер Флагг тэргүүтэй драфтын ангийн төлөө явах уу гэдгээ шийдэх мөч ирээд байна. Хэрэв ухаалаг ажиллаж сэрэглэн ажиллаж чадвал энэхүү солилцооны цонх нь багуудад аварга ч авч ирэх боломжийг бүрэн нээж өгдөг билээ. Хамгийн сүүлийн жишээ л гэхэд Даллас Маверикс өвлийн солилцооны цонхоор ПЖ Уашингтон болон Даниел Гаффорд нарыг шүүрч улирлаа 180 градус эргүүлж финал хүртэл явсан байдаг.

Дорнод бүсийн плейоффын эхний 8 байрт бүрэн шалгарах боломжтой гурван багийн тухай ярилцъя.

1.Атланта Хокс

Зэрэглэл: Өрсөлдөөн үзүүлэхүйц

Чиг хандлага: Бүсийн финалд хүрч байсан амжилтаа давтах

Амжилт: 14-13 (бүсдээ 7-д)

Тэдэнд уналт хийж ирэх жилийн драфтын төлөө явах гэсэн сонголт байхгүй. Учир нь гэвэл Хокс унаад драфтын эхний тойргийн сонголт хийх эрхтэй болсон ч тэр сонголт нь Спөрсруу явах заалттай байгаа. Уналт хийх ямар ч шаардлагагүй гэсэн үг. Сая болж өнгөрсөн NBA CUP-ын тоглолтнуудад өөрсдийгөө ямар потенциал боломжтой баг гэдгээ хангалттай олж харсан болов уу. Дорнод бүсийн фаворит Нью Йорк Никсийг эхний шатанд Маддисон Скүар Гарденд үзэгч олных нь өмнө мултлаад шилдэг дөрвөн багийн нэг болоод амжсан билээ. Тэд энэ жил зогсох цэг хүртлээ тэмцэх бөгөөд энэ урт замын төлөвлөгөөнд нь Богдан Богданович болон Клинт Капела нар багтахгүй байгаа тул эдгээр хоёр тоглогчоо энэ цонхоор яаралтай явуулах хэрэгтэй.

Серби залуу Богдановичийн хувьд одоо дөнгөж 32 настай ч бэртэл гэмтлийн түүх ихтэй, хамгаалалтад үр нөлөө төдийлөн үзүүлж чадахгүй байгаа билээ. Тэрээр 25.1 минутад 11.8 оноог сэлгээнээс дундажлаж байгаа ба бэртэлгүй үнэ цэнээ алдаж эхлээгүй байх яг энэ үед нь амжиж явуулаад оронд нь ус агаар мэт хэрэгтэй байгаа хамгаалдаг хар ажлын сэлгээний тоглогч авч ирж чадвал тэдний хувьд хожил.

Капелагийн хувьд энэ зун багаас хамааралгүй чөлөөт агент болох ба түүний хүссэн хэмжээний мөнгийг нь өгөхгүй бол явах нь тодорхой болсон байгаа билээ. Түүн шиг шидэлтгүй өгснийг нь тохдог төв Лигээр дүүрэн байгаа тул явуулаад оронд нь энэ улиралдаа хэрэг болчих тоглогчоор тулах нь мэдээж багт ашигтай тусах юм.

Сэлгээнээс энэ улиралд “шилдэг зургаа дахь тоглогчийн шагналд” хүчтэй өрсөлдөж буй Хантер, Пеликансаас зун авсан Лигийг таслалтаараа тэргүүлж буй Дайсон Даниелс, өсөх ирээдүйтэй ирээдүйн супер од замдаа орсон Жонсон, Муррайг явуулж хэн ч лидерийн байр суурийг Янгтай булаацалдахгүй зөвхөн ганц лидертэй болсон гээд энэ баг тун гоё болсон байгаа билээ. Хэрэв солилцооны үеээр хэрэгтэй тоглогчоо аваад ирвэл тэд бүсийнхээ шилдэг дөрвөн баг болоход би лав гайхахгүй.

2.Миами Хит

Зэрэглэл: Өрсөлдөөн үзүүлэхүйц

Чиг хандлага: Явуулна бас авна

Амжилт: 13-11 (бүсдээ 6-д)

Пат Райли энэ багийг хэзээ ч уналтад орж плейоффын гаднаас мултарч байгааг харахыг хүсэхгүй. Гэхдээ тэрээр Жимми Батлерд гэрээний сунгалт өгөхгүй гэдгээ мэдэгдсэн. Хэрэв түүнийг энэ солилцооны цонхоор явуулж чадахгүй бол зун хоосон алдах аюултай байгаа билээ. Тиймээс яг одоо 35 настай Жиммигийн оронд илүү Миамигийн ирээдүйд хэрэгтэй, залуу, өсөж яваа тоглогч авсан нь илүү ашигтай юм. Жиммигийн ч саяхан болсон Пистонсын эсрэг тоглолтод 35+ оноо, 19+ самбар, 10+ дамжуулалт өгөхдөө 0 бөмбөг алдалт, 0 хувийн алдаа гэсэн төгс гэж хэлж болохуйц тоглолт үзүүлж NBA-н түүхэн дэх анхны бөгөөд цор ганц тоглогч болсон билээ. Уг тоглолтоороо өөрийгөө одоо ч хэвээрээ шүү гэдгээ тунхагласан гэж хэлж болно.

Батлераас гадна Терри Розиер, Данкан Робинсон хоёр дээр санал сонсоно гэж ээ. Ер нь 30+ насны бүх тоглогчоо явуулахад бэлэн байгаа ба тэдний ерөнхий зорилого нь дундаж наслалтаа залуужуулангаа плейоффд өрсөлдөнө гэж байгаа бололтой.

3.Орландо Межик

Зэрэглэл: Өрсөлдөөн үзүүлэхүйц

Чиг хандлага: Худалдан авалт

Амжилт: 17-11 (бүсдээ 4-т)

Хэдийгээр энэ багийн хоёр лидер нь Банкеро, Вагнер хоёуул хэвлийний ташуу булчингийн урагдал гэдэг оноштойгоор он дуустал талбайд гарах боломжгүй болсон гэдэг тун харамсалтай мэдээтэй ч тэд баг болгонтой өрсөлдөөн үзүүлж сүүлийн мөч хүртэл ойрхон тоглож байгаа гэдгийг бид харж байна. Тэд түрүү зун Вагнер болон Саггстай гэрээний сунгалтыг хийж мөн Банкерод ирэх зун макс гэрээг санал болгохоор бэлдээд байгаа тул тэд санхүүгийн хувьд тийм ч боломжтой баг биш юм. Энэ багийн rotation-с бараг шахагдаж гарч байгаа үнэд хүрэх ганц тоглогч нь Көүл Энтони бөгөөд түүний 12,9 сая долларын цалинг ашиглаж солилцоо хийх боломжтой юм. Гари Харрис - 7,5 сая доллар - ирэх зун багаас хамааралтай чөлөөт агент болж байгаа тул түүнийг хүссэн үедээ явуулах боломжтой. Бүр болохгүй бол тэд Гога Битадзедээ бүрэн найдаад Жонатан Айсакийн 25 сая долларын цалинтай гэрээг ч наймаандаа ашиглах боломжтой юм.

Энэ гэрээнүүдийг хоёр лидерийх нь эзгүй энэ цаг хугацаанд орлож оноог явуулах чадвартай, довтолгооны чиглэлийн тоглогч аваад ирж чадвал тэдний хамгаалалттай бол ярих зүйл байхгүй шүү дээ. Тэд энэ улирал нэг тоглолтод дунджаар 106.1 оноог өрсөлдөгч багт алдаж байгаагаараа Лигт эхний гуравт бичигдэж байгаа тун сайн хамгаалалттай баг билээ.