Парис хотын захиргааны нэгэн инженерээс ирэх зун болох Олимпын наадмын тухай тэмдэглэл бүхий нууц мэдээлэл агуулсан цүнх хулгайлжээ. Энэхүү этгээдэд долоон сарын хорих ял оноосныг шүүхийн эх сурвалж баталж байна. 

Франс Пресс агентлагийн мэдээлснээр, 2024 оны Парисын аюулгүй байдлын төлөвлөгөөний талаарх нууцлаг мэдээллийг агуулсан цүнх хулгайлсан этгээдийг гэмт хэрэг үйлдсэн хэргээр баривчилж, долоон сарын хорих ялаар шийтгэсэн болохыг шүүхийн эх сурвалж баталжээ. Даваа гарагийн орой Гаре ду Норд өртөөнд галт тэргэнд уг хулгай хэрэг гарчээ. Үүний дараа шүүгдэгч баасан гарагт Францын нийслэл хотын шүүхэд ирсэн байна. Энэ цүнх Парисын хотын захиргааны нэгэн инженерийнх байсан бөгөөд тэрбээр түүнийг суудлынхаа дээгүүр ачаа тээшний тасалгаанд хийсэн байсныг 23 настай залуу хулгайлжээ. Цагдаагийн эх сурвалж цүнхэнд Парисын олимпод зориулсан хамгаалалтын төлөвлөгөө бүхий компьютер, хоёр USB зөөгч байсан гэж мэдээлснээр энэ гэмт хэрэг олны түгшүүрийг төрүүлжээ.

Гэвч хэд хоногийн дараа Парисын прокурорын газраас USB дискэнд "Олимпын наадмын үеэр Парис дахь замын хөдөлгөөний тухай тэмдэглэл л агуулагдаж, аюулгүй байдлын нууц мэдээлэл байхгүй" гэж мэдэгдсэн байна. 

Сэжигтэн нь нийтийн тээвэрт удаа дараа хулгай хийсэн хэргээр цагдаад бүртгэлтэй нэгэн байжээ. Шүүгдэгч нь хулгайн хэргээр давтан гэмт хэрэг үйлдсэнээс гадна утасны кодыг холбогдох байгууллагад өгөхөөс татгалзсан гэх үндэслэлээр яллагдагчаар татжээ. Парис хотын захиргаанаас гаргасан мэдэгдэлд яллагдагчийг USB-г ашигласан эсэх, дотоод аюулгүй байдлын дүрэм зөрчсөн зэргийг тогтоохоор шалгаж байгаа гэнэ.

Долдугаар сарын 26-наас наймдугаар сарын 11-ний хооронд болох зуны 33 дахь олимпын наадмын үеэр аюулгүй байдлын 35,000 орчим албан хаагч, түүний дотор нийслэлийн 2,000 орчим цагдаагийн алба хаагчид үүрэг гүйцэтгэх юм. Олон түмнийг хянах, гэмт хэргээс урьдчилан сэргийлэхийн зэрэгцээ Франц улс сүүлийн 10 жилийн хугацаанд лалын хэт даврагчдын бай байсаар ирсэн тул цагдаа нар террорист халдлага гарч болзошгүй тул өндөржүүлсэн бэлэн байдалд ажиллахаа мэдэгдээд байна.