Парисын олимп эхлэхэд нэг сар 20 хоногийн хугацаа үлдээд байгаа энэ цаг мөчид ихэнх төрлүүдийн эрхий тэмцээнүүд өндөрлөх шатандаа орж байна.

Боксын төрлөөр 33 дахь олимпын наадамд Монгол улсыг төлөөлөх хоёр тамирчин эцсийн байдлаар тодорлоо. Тодруулбал, эмэгтэйчүүдийн -50 кг-д Ханжоу-2023 Азийн наадмаас эрхээ авсан О.Есүгэн болон Тайландад болсон сонирхогчдын боксын олимпын эрхийн сүүлийн тэмцээнээс 54 кг-ын жинд эрхээ авсан ОУХМ М.Энхжаргал нар Францыг зорино.“Парис-2024” олимпын эрх олгох боксын спортын тэмцээн Тайланд улсад зохиогдож, өндөрлөлөө. Манай улсаас нийт эрэгтэй, эмэгтэй жинд 11 тамирчин өрсөлдөж, нэг тамирчин эрхээ авсан юм. 

Харин эрэгтэй боксчид Парист болох 33 дахь олимпын наадмын эрхээ авч чадсангүй, өнжихөөр боллоо. Манай ширэн бээлийтнүүд олимпын наадмаас 1 алт, 2 мөнгө, 4 хүрэл медаль хүртсэн түүхтэй. 

Тодруулбал : 

Сөүл 1988 - Нэргүйн Энхбат хүрэл медаль

Барселона 1992 - Намжилын Баярсайхан хүрэл медаль

Бээжин 2008 - Пүрэвдоржийн Сэрдамба мөнгөн медаль

Бээжин 2008 - Энхбатын Бадар-Ууган алтан медаль

Лондон 2012 - Нямбаярын Төгсцогт мөнгөн медаль

Лондон 2012 -  Уранчимэгийн Мөнх-Эрдэнэ хүрэл медаль

Рио 2016 - Доржнямбуугийн Отгондалай хүрэл медаль тус тус хүртжээ.