Парисын олимпод Монголын эмэгтэй боксчдын түүхэнд ОУХМ М.Энхжаргал Олимпын тавцанд ялалт байгуулж, цоо шинэ хуудас нээсэн. Тэрбээр өнөөдөр медалийн төлөө хариуцлагатай тулаан хийх гэж байна.

-54кг жинд тулалдаж буй М.Энхжаргалын хувьд эхний учраа болох дэлхийн аваргын мөнгөн медальт Италийн боксчин Сирин Чараабитаг шүүгчдийн санал нэгтэй шийдвэрээр ялж монголын эмэгтэй боксчдын олимпын наадмын анхны ялалтыг авсан юм. 

Дэлхийн цомын аварга, U22 насны Ази тивийн аварга, дэлхийн аваргын хүрэл медальт ОУХМ М.Энхжаргал шөвгийн 16-д 2022 оны ДАШТ-ий мөнгө, энэ оны европын аваргын мөнгөн медальт Румын улсын Ленута Лекрамиоараг буулган авч олимпын медалийн төлөө тулалдах эрхтэй болсон билээ. М.Энхжаргал нь 2023 оны ДАШТ-ны хүрэл медаль хүртэж дэлхийн боксчин гэдгээ батлан харуулсан.

Харин өнөөдөр бол түүний шийдвэрлэх тулаан болно. Тэрбээр олимпын хүрэл медалийн төлөө Туркийн боксчин Акбас Хатистэй тулалдана. Акбас Хатис нь 2022 оны Истанбулд болсон ДАШТ-ий аварга, 2023 оны Европын АШТ-ий хүрэл медальтай, өдгөө 23 настай залуу тамирчин юм. Тэдний тулаан өнөөдөр 23:22 цагаас эхлэх хуваарьтай байна.