Европын хөлбөмбөгийн хамгийн нэр хүндтэй тэмцээн болох аваргуудын лигийн шөвгийн 16-ийн эхний дөрвөн тоглолт явагдлаа. Аваргуудын лигийн шөвгийн 16-д Английн 6 баг, Испанийн 3 баг, Германы 2 баг, Франц, Турк, Итали, Португал, Норвегийн тус бүр 1 баг шөвгийн 16-д үлдсэн билээ.

/Турк/ Галатасарай 1:0 Ливерпүүл /Англи/

Аваргуудын лигийн шөвгийн 16-ийн тоглолтыг нээж, Туркийн аварга Галатасарай клуб өөрсдийн “Rams Park” цэнгэлдэх хүрээлэндээ Английн аварга Ливерпүүл клубийг хүлээн авч тоглолоо. Тус тоглолтын 7 дахь минутад Галатасарай клубийн довтлогч Виктор Осимхений дамжуулалтаар Марио Лемина мөргөж гоол оруулж, үндсэн цагт талбайн эзэн Галатасарай клуб 1:0 харьцаатайгаар ялалт байгууллаа. Тус хоёр багийн хариу тоглолт 3-р сарын 19-нд 04:00 цагаас Ливерпүүл клубийн “Anfield” цэнгэлдэхэд явагдана.

/Испани/ Атлетико Мадрид 5:2 Тоттенхэм Хотспур /Англи/

Испанийн шилдэг баг Атлетико Мадрид клуб өөрсдийн “Riyadh Air Metropolitano” цэнгэлдэхдээ өнгөрсөн улирлын Европа лигийн аварга Английн Тоттенхэм Хотспур клубийг хүлээн авч тоглолоо. Тус тоглолтын эхний үеийн 6 дахь минутад Хулиан Альваресийн дамжуулалтаар Маркос Льорене гоолийн салхийг нээж, 1:0 болгов. Тоглолтын 15 дахь минутад Францын шигшээ багийн болон талбайн эзэн Атлетико Мадрид клубийн шилдэг тоглогч Антуан Гризманн гоол оруулж, 2:0 болгов. Түүний гоолоос ердөө минутын дараа Тоттенхэм клубийн Чех хаалгач Антонин Кинскигийн болчимгүй алдааг Хулиан Альварес ашиглаж, тоглолтын 16 дахь минутад талбайн эзэд 3:0 харьцаатай тэргүүлж эхлэв. Улмаар тоглолтын 22 дахь минутад Антуан Гризманны чөлөөт цохилтоос ойж ирсэн бөмбөгийг Робин Ле Норман мөргөж гоол оруулан 4:0 болгов. Тоглолтын 26 дахь минутад Ричарлисоны дамжуулалтаар Педро Порро гоол оруулж, эхний хагаст талбайн эзэд 4:1 харьцаатай илүүрхэв. Тоглолтын хоёрдугаар хагасын 55 дахь минутад Антуан Гризманны дамжуулалтаар Хулиан Альварес гоол оруулж, 5:1 болгов. Гэсэн ч тоглолтын 76 дахь минутад Педро Поррогийн дамжуулалтаар Доминик Соланке гоол оруулж, үндсэн цагт талбайн эзэд 5:2 харьцаатайгаар ялалт байгууллаа. Тус хоёр багийн хариу тоглолт 3-р сарын 19-нд 04:00 цагаас Тоттенхэм клубийн “Tottenham Hotspur Stadium” цэнгэлдэхэд явагдана.

/Англи/ Ньюкасл Юнайтед 1:1 Барселона /Испани/

Английн шилдэг багуудын нэг Ньюкасл Юнайтед клуб өөрсдийн “St. James Park” цэнгэлдэхдээ Испанийн аварга Барселона клубийг хүлээн авч тоглолоо. Тус тоглолтын эхний үед хоёр баг харилцан маш өрсөлдөөнтэй тоглолтыг үзүүлж байсан ч хаалганы тор хөдөлсөнгүй. Харин хоёрдугаар хагасын 86 дахь минутад талбайн эздээс Харви Барнс гоол оруулж, 1:0 болгов. Гэсэн ч үндсэн цаг дуусаж, шүүгчийн мэдлийн 6 дахь минутад Испанийн шигшээ багийн од Ламин Ямаль 11 метрийн торгуулын цохилт амжилттай гүйцэтгэж, 1:1 харьцаатайгаар эвийн гэрээ байгууллаа. Тус хоёр багийн хариу тоглолт 3-р сарын 19-нд 01:45 цагаас Барселона клубийн “Camp Nou” цэнгэлдэхэд явагдана.

/Итали/ Аталанта 1:6 Байерн Мюнхен /Герман/

Италийн шилдэг багуудын нэг Аталанта клуб өөрсдийн “Gewiss Stadium” цэнгэлдэхдээ Германы аварга Байерн Мюнхен клубийг хүлээн авч тоглолоо. Тус тоглолтод эхний хагаст Германы аварга Байерн Мюнхен клубээс Йосип Станишич, Майкл Олисе, Серж Гнабри нарын гоолоор талбайн зочид 0:3 харьцаатайгаар илүүрхэв. Улмаар тоглолтын хоёрдугаар хагаст Николас Жексон, Майкл Олисе, Жамал Мусиала нар гоол оруулж, 0:6 болгов. Тоглолтын үндсэн цаг дуусаж, нэмэлт 3 дахь минутад талбайн эздээс Марио Пасалич гоол оруулж, 1:6 харьцаатайгаар талбайн зочид Байерн Мюнхен клуб илүүрхлээ. Тус хоёр багийн хариу тоглолт 3-р сарын 19-нд 04:00 цагаас Байерн Мюнхен клубийн “Allianz Arena” цэнгэлдэхэд явагдана.

Аваргуудын лигийн шөвгийн 16-ийн өнөөдрийн хуваарь:

/Герман/ Байер Леверкузен – Арсенал /Англи/ 3-р сарын 12-нд 01:45 цагаас

/Франц/

Парис Сен-Жермен – Челси /Англи/ 3-р сарын 12-нд 04:00 цагаас

/Норвеги/

Буде Глимт – Спортинг /Португал/ 3-р сарын 12-нд 04:00 цагаас

/Испани/

Реал Мадрид – Манчестер Сити /Англи/ 3-р сарын 12-нд 04:00 цагаас