NBA-ийн 2026-27 оны улиралд хэн хожив, хэн хожигдов, багуудын өмнө ямар том сорилтууд байна вэ? Шинэ улирлын өмнө багууд том болон жижиг солилцоо наймааг хийж байна. Энэ солилцоо дундаас том гэж хэлж болохуйц солилцоонуудыг онцолж байна.

Майами Хит

Дорнод бүсийн өрсөлдөөн улам ширүүсэж байгаа энэ үед хамгийн том наймааг хийсэн баг бол Майами Хит. Тэд Милуоки Бакс-аас хоёр удаагийн MVP Яннис Антетокунмпо-г авахын тулд Тайлер Херро, эхний тойргийн гурван драфтын эрх болон бусад тоглогч, эрхүүдээ өгсөн. Одоогоор Торонто, Филадельфи хоёр ч бас том наймаа хийсний дараа Майами Хит багийн энэ шийдвэр нь бүр ч зөв болох харагдаж байна.

Торонто Кавай Леонардыг, Филадельфи Жейлен Брауныг авснаар хүснэгтэд дээшлэх зорилго тавьсан. Гэхдээ ирэх улиралд хамгийн их нөлөө үзүүлэх од тоглогч нь Антетокунмпо байх магадлал өндөр. Цаашлаад урт хугацааны гэрээний хувьд ч тэр хамгийн үнэ цэнтэй тамирчин хэвээр байна.

Яннис Антетокунмпо нь Кавай Леонардоос гурван насаар залуу тамирчин. Сүүлийн таван улиралд Яннис багийнхаа тоглолтын 75 хувьд оролцсон бол Леонардынх ердөө 54 хувь. Мөн энэ хугацаанд тэр Жейлен Браунаас илүү оноо, самбар, оновчтой дамжуулалтын дундаж үзүүлэлттэй байсан бөгөөд статистик үзүүлэлтүүдээр ч илүүрхсэн.

Өнгөрсөн улиралд бэртэлтэй байсан болохоор хүмүүс түүний ноёрхлыг бага зэрэг мартсан байж магадгүй. Гэхдээ сүүлийн арван жилийн турш Антетокунмпо бол багтаа ялалт авчирдаг хамгийн нөлөө бүхий тоглогчдын нэг байсан. Хэдийгээр Норман Пауэлл чөлөөт агентын зах зээлээр Чикаго Буллс руу явсан нь Майамид гарз болсон ч Яннис Антетокунмпо хуучин формдоо эргэн орж чадвал Хитийн амжилт эрс сайжрах бүрэн боломжтой.

Бостон Селтикс

Энэ зуны солилцооны зах зээл дээр хамгийн их алдсан багуудын нэг бол Бостон Селтикс. Тэд Яннис Антетокунмпо-г авахын тулд Жейлен Браун-ыг санал болгосон ч Милуоки Бакс зөвшөөрөөгүй. Ингээд эцэст нь Филадельфи 76 багаас Пол Жорж болон эхний тойргийн хоёр, хоёрдугаар тойргийн хоёр драфтын эрхээр Брауныг сольжээ.

Өөрөөр хэлбэл, Финалын MVP цолтой 29 настай Брауны оронд 36 настай Пол Жоржийг авсан гэсэн үг. Харин Жорж сүүлийн хоёр улиралд Филадельфид тоглосон хугацаандаа талбайд гарснаасаа илүү олон тоглолтыг өнжсөн. Түүнчлэн өнгөрсөн улиралд NBA-ийн хориотой бодисын журмыг зөрчсөн тул 25 тоглолтын торгуультай байсан.

Пол Жорж холын зайн шидэлтээрээ одоо ч аюултай тоглогч хэвээр байгаа нь үнэн. Гэхдээ Бостон энэ зун зөвхөн гурвын шидэлтэд тулгуурласан довтолгоогоо өөрчилж, цагираг руу илүү дайрдаг болохыг зорьж байсан нь Яннис Антетокунмпог авах шийдвэрээс харагдсан. Харин энэ наймаа эсрэгээрээ болсон гэж хэлж болно. 

Бостон төвийн байрлалдаа Митчелл Робинсон-ыг Нью-Йорк Никс-ээс авч хамгаалалтаа сайжруулсан нь одоогоор хамгийн зөв алхам болоод байна. Гэхдээ Жейлен Браун, Жэйсон Тэйтум хоёрын олон жилийн амжилттай хамтрал ийм байдлаар өндөрлөсөн нь олон хүнд сэтгэл дундуур байгаа байх.

Энэ наймааны цаад зорилго нь Брауны дараагийн асар өндөр үнэтэй гэрээг байгуулахаас зайлсхийх байсан бололтой. Гэхдээ хариуд нь авсан зүйл нь хангалттай ашигтай харагдахгүй байна. 2027 оны аваргын төлөөх өрсөлдөөнд Бостоныг нэг алхам ухраасан шийдвэр болсон бөгөөд олон драфтын эрх цуглуулсан "том ашигтай наймаа" гэж хэлэхэд ч хэцүү байна.

Лос Анжелес Лэйкерс

Энэ зун Лэйкерсийн ерөнхий менежер Роб Пелинка асар их дарамт дунд ажиллалаа. Клуб шинэ эзэмшигчтэй болсон, Лука Дончич төвийн байрлалд хүч нэмэхийг хүсэж байсан, харин Леброн Жэймс найман жилийн дараа багаа орхисноор Лэйкерс шинэ эрин үеэ эхлүүлсэн.

Гэвч ерөнхий менежер Пелинка нь Уокер Кесслер-ийг авахын тулд хэтэрхий өндөр үнэ төлсөн гэж олон хүн үзэж байна. Лэйкерс түүнд бараг л бүх одын тоглогч эсвэл ирээдүйн франчайз тоглогч авах хэмжээний драфтын эрхүүдийг зориулсан. Гэтэл Кесслер бол сайн гарааны төвийн тоглогч ч тийм хэмжээний супер од биш. Юутай ч Лэйкерсийн төвийн асуудлыг тодорхой хэмжээнд шийдэх ч ирээдүйн нөөц боломжоо ингэж ихээр золиослох хэмжээний наймаа байсан эсэх нь эргэлзээтэй. Үүнээс гадна энэ солилцоо багийн 2027 оны аваргын төлөөх боломжийг ч төдийлөн нэмэгдүүлээгүй.

Чөлөөт агентын зах зээл нээгдсэнээс хойш Лэйкерс зөвхөн Леброныг биш, Маркус Смарт, Люк Кеннард, Жэксон Хэйс нарыг ч алдсан. Мөн Рүй Хачимүра ч багаас явж магадгүй гэсэн мэдээлэл гарсаар байна.

Харин Пелинка нь Остин Рийвс-тэй шинэ гэрээ байгуулж, Квентин Граймс, Сандро Мамукелашвили, Коллин Секстон нарыг нэгтгэсэн. Гэсэн ч ирэх улиралд Лэйкерсийн бүрэлдэхүүн хоорондын ойлголцол сул, мөн хоёр довтлогчийн байрлалд том асуултын тэмдэг хэвээр байна.

Лука Дончич MVP түвшний улирал үзүүлсэн ч гэсэн энэ бүрэлдэхүүнээрээ Баруун бүсийн тэргүүлэх багуудтай эн тэнцүү өрсөлдөхөд шаардлагатай авьяас, нөөц болон туршлага Лэйкерст хангалттай биш харагдаж байна.