NBA-ийн тоглогч асан Кармело Энтоногийн хүү Киян Энтони сагсан бөмбөгийн замналаа үргэлжлүүлж байгаа ба тэрбээр энэ жил коллежид суралцах болсон. Түүнийг ESPN-ээс 2025 оны драфтын шилдэг 100 тамирчны 36-р байранд эрэмбэлээд байгаа. Кармело Энтони NBA-д 2003 онд элсэхээсээ өмнө Сиракуйс Оранж багийг удирдан NCAA-ийн аваргын шатанд шалгарч байсан юм. Мөн тэрбээр өөрийн нэрээр нэрлэгдсэн сургуулийн сагсан бөмбөгийн талбайд олон жил багагүй хэмжээний хөрөнгө мөнгө хандивласан.

Харин түүний хүү Киян аавынхаа коллежийн замналыг үргэлжлүүлэх, түүний өвийг хүлээж авах тал дээр өөрийнхөөрөө шийдвэр гаргахыг илүүд үзнэ гэжээ. Кармелол болон ээж Ла Ла Энтони нар түүнийг Сиракузын Их сургуулийг сонгоосой хэмээн хүчлээгүй гэнэ.

Киян Энтони “YouTube” сувгаар цацагдах "The Evolu7ion" киноны хоёр дахь анги гарахын өмнө ESPN-д өгсөн ярилцлагадаа "Аав маань биеийн тамирын заалны дээр түүний нэр бичигддэг учраас Сиракузыг сонго гэж шахдаггүй. Тэр Сиракузад маш их зүйлийг хийсэн. Тэр намайг өөрийнхөөрөө байдаг хүн гэдгийг мэдэж байгаа учир сагсан бөмбөгийн замналаа хэрхэх тал дээр би өөрөө шийдвэрээ гаргах ёстой” гэжээ.

Энтони дараагийн хоёр сарын хугацаанд Сиракуз, Оберн, USC, Флорида муж, Охайо муж, Ратгерс гэсэн сургуулиудаас сонгох бөгөөд эцсийн шийдвэрээ гаргахаасаа өмнө Сиракуз сургуульд дахин зочилно хэмээн хэлсэн байна.

Мөн тэрбээр аль сургуулийг сонгох тал дээр найзуудтай зөвлөлдөнө гэсэн ба "Найзуудад маань надтай адил боломж байхгүй байж магадгүй. Би тэднийг өөртэйгөө хамт дэвшин дээшлэхэд үргэлж хичээдэг. Би тэднийг орхиод явахыг хүсэхгүй байна" гэжээ.