Сена мөрний бохирдлын улмаас ирэх жил Парист болох Олимпийн наадмын туршилтын тэмцээн болох усан сэлэлтийн дэлхийн цомын тэмцээн цуцлагдаад байна. Үүний дараа Дэлхийн усан спортын байгууллага тамирчдын эрүүл мэнд хамгийн тэргүүний зорилт гэдгийг сануулж, илүү их анхаарал хандуулж, тэмцээний орчинг сайжруулахыг шаарджээ.Дэлхийн усан спортын холбооны удирдах зөвлөл ням гарагийн өглөө эрт Сена мөрний усны хамгийн сүүлийн үеийн дээжийг шинжилсний дараа ийм шийдвэр гаргасан байна.  Тодруулбал, Саяхан Парист хур тунадас дунджаас илүү хэмжээгээр орсны дараа бохир усны шугам хальж, Сена мөрний усны чанар усанд сэлэгчдийн эрүүл мэндийг хамгаалах стандартаас доогуур түвшинд хүрэхэд нөлөөлжээ. Усан спортын дэлхийн удирдах байгууллага болон нийтийн эрүүл мэндийн байгууллагууд зөвлөлдсөний үндсэн дээр олимпийн туршилтын тэмцээнийг цуцлахаар шийджээ. Дэлхийн усан спортын холбооны ерөнхийлөгч Хусаин Аль-Мусаллам "Дэлхийн усан спортынхон Сена мөрний усны чанараас болж дэлхийн усан спортын нээлттэй усан сэлэлтийн дэлхийн цомын тэмцээнийг цуцалсанд сэтгэл дундуур байна. Гэхдээ манай тамирчдын эрүүл мэнд үргэлж бидний нэн тэргүүний зорилт байх ёстой" гэж хэлжээ. Холбооны зүгээс дараа жилийн Олимпийн наадмын өмнө Сена мөрний усны чанарыг эрс сайжруулахын тулд дэд бүтцийн төслүүд хэрэгжиж дуусна гэдэгт найдаж байна. Дэлхийн усан спортынхон ирэх зун дэлхийн шилдэг задгай усанд сэлэгчдийн Олимпийн уралдааныг хотын төвд зохион байгуулах гэж байгаадаа баяртай байна гэжээ.

8-р сарын 4-нд болох байсан бэлтгэл сургуулилтыг цуцалж, усны чанар сайжирна гэж найдаж эмэгтэйчүүдийн уралдааныг бямба гарагаас ням гараг хүртэл хойшлуулж, эцэст нь цуцлахад хүрсэн байна. Парис хотын дарга Анн Идальго Францын нийслэлд болох олимпод зориулж Сена мөрний цэвэрлэгээнд онцгой түлхэц үзүүлэхээ амлажээ.  Өмнө нь Францын Эрх баригчид 1923 онд бохирдол ихтэй байсан тул Сена орчимд усанд сэлэхийг хориглож байсан бөгөөд энэ асуудал 16-р зуунд протестант болон католик шашинтнуудын хооронд болсон шашны дайнд амь үрэгдэгсдийн цогцсыг усанд хаяснаас хойш үргэлжилсэн асуудал байжээ.   6-р сарын 6-наас 7-р сарын 19-ний хооронд авсан дээжийн үр дүнгийн дагуу Бүсийн Эрүүл мэндийн газраас гаргасан нааштай дүгнэлт нь тамирчдыг Сена мөрөнд усанд сэлэх боломжтой гэсэн үр дүнд хүргэсэн байна. Улмаар 7-р сарын эхээр усанд сэлэгчид олон нийтийн усан сэлэлтийн байгууламжид зориулагдсан Парисын хотын төвийн гурван газрын нэг болох Брас Мари дахь Сена мөрөнд очиж, бэлтгэлээ базааж байсан байна. Сүүлийн хоёр Олимпийн наадамд задгай усанд сэлэх нь бохирдлын асуудалд холбогдсоор ирсэн. Эргэн санахад, 2019 онд Токио 2020 тэмцээнийн усанд сэлэгчид Токиогийн булан дахь усны чанарыг эсэргүүцэж байсан юм. Мөн 2016 оны Рио-де-Жанейрогийн Олимпын наадмын өмнө ус нь хог, хортой хаягдлаар маш ихээр бохирдсон Гуанабара буланд усанд сэлэх эсэх талаар хэдэн сарын турш маргаан өрнөж байжээ. Энэ сарын сүүлээр Сена мөрөнд олимпийн триатлоны туршилтын тэмцээн болох бөгөөд тухайн үед усны чанар хангалттай сайжирна гэж зохион байгуулагчид найдаж байна.  Одоогийн цаг агаарын урьдчилсан мэдээнд үндэслэн сонгомол тамирчид энэ сарын сүүлээр буюу 8-р сарын 17-20-нд Парист болох Дэлхийн Триатлоны болон Пара Триатлоны Туршилтын арга хэмжээнд Сена мөрөнд өрсөлдөх юм.