Сагсан бөмбөгийн 3х3 төрлийн Азийн аварга шалгаруулах тэмцээн Сингапурт энэ сарын 27-31 өдрүүдэд зохиогдоно. Азийн аваргын тэмцээн нийтдээ долоо дахь удаагаа зохиогдох гэж байгаа бол Сингапур сүүлийн гурав жилд зохиогдож байна.  Эрэгтэй 23 улсын шигшээ баг, эмэгтэй 20 улсын шигшээ баг оролцох бөгөөд Монголын эрэгтэйчүүдийн шигшээ чансааны хоёрдугаарт, эмэгтэйчүүдийн шигшээ гуравдугаарт бичигдэж байна.

Эрэгтэйчүүдийн шигшээ багт саяхан аваргын цом өргөсөн Хасын Хүлэгүүд багийн залуу тоглогчид болох А.Азбаяр, Ч.Тэмүүлэн, С.Биндэръяа нар багтсан байна. 

Өнгөрсөн жил Монголын эрэгтэй шигшээ баг хүчирхэг Австралийн багийг ялж, Ази тивийн хоёр дахь түрүүгээ авсан. Харин тус багийн бүрэлдэхүүнд багтсан А.Ананд, Д.Дэлгэрням, Э.Дөлгөөн, О.Энхбаатар нар энэ удаагийн тэмцээнд гэмтэл бэртэл болон зарим шалтгаануудын улмаас багтаагүй юм. 

Харин эмэгтэйчүүдийн шигшээ багт Азийн наадамд мөнгөн медаль хүртсэн Б.Ариунцэцэг, Ө.Индра нараас гадна М.Цэрэнлхам, О.Хулан нар багтжээ.

Тэмцээн нийт 4 хэсэгт хуваагдсан байна. Монгол улсын эрэгтэй шигшээ баг B хэсэгт Тайландын багтай таарсан ба БНСУ, Индонези, Шри Ланка, Хойд Марианы арал зэрэг улсуудын аль хожсон нь манай зоонд багтана.

Харин эмэгтэй шигшээ баг тэмцээний С хэсэгт Малайзын багтай таарсан ба Энэтхэг, Индонези, Хонг-Конг, Хятад, Хойд Марианы арал зэрэг улсуудын аль хожсонтой нь тоглох хуваарьтай байна.