3 сарын 15
Б.Очирваань /Wazza/ хэмээх Монгол залуу Английн Премьер лигийн Манчестер Юнайтед, Ньюкастл багуудын тоглолтын урилгыг Прьемьер лигээс авсан. 4-р сарын 20-нд болох уг тоглолт Англи улсад болно. Уг тоглолтыг үзэхээр Монголоос Англи улсыг ямар ч тээврийн хэрэгсэл ашиглалгүй зөвхөн унадаг дугуйтай туулж буйгаараа онцлогтой. Одоо Франц улсад очсон байгаа бөгөөд одоогоор Их Британи улс руу нэвтрэх виз мэдүүлсэн харамсалтай нь татгалзсан хариу авсан байна. Түүний Шенгений виз 3-р сарын 22-нд дуусна.
Тэрбээр татгалзсан хариу авсныхаа дараа өөрийн цахим хуудаснаа ийнхүү нийтэлжээ.
“Хайрт Манчестер минь би маш ойрхон ирсэн ч одоохондоо очиж чадахгүй юм шиг байна…
Юу ч гэсэн бодсоноо эхлүүлж, өдийг хүртэл тууштай байсан өөртөө баярлалаа
Хамгийн гол нь эцсээ хүртэл тэмцсээр л байгаа шүү! Гэхдээ яг одоогоор бол хана мөргөсөн. Сэтгэл дотроо ч цуцаж байна. Хоёр алхам ойртсон ч нэг алхам буцах боллоо. Миний хүч хангалттай байсан ч боломж маань хүрсэнгүй.
Дөнгөж сая виз татгалзсан хариу авлаа. Шенгений визний хугацаа 3 сарын 22нд дуусах болохоор Парист ирээд яааралтайгаар виз мэдүүлэхэд €738 зарцуулсан. Эмээгийнхээ тэтгэвэрийн зээлээр эцсийн боломжоо ашигласан виз гарсангүй. Би хэлсэндээ хүрч зорьсон газраа очиж чадсангүй. Одоо яахав миний байгаа байдал боломж визний шаардлагын хангаж чадсангүй. Визийг бол хэзээ ч аяллын түүхээр өгөхгүй шүү дээ. Аяллын амжиргааны чадамж, санхүүжилт, буцах баталгаа нтр гээд олон зүйл хардаг болохоор яг эдгээр нь надад байхгүй юм байна.
Өөрийнхөө бүх л чадах боломжоор оролдлого хийсэн шүү. Одоо тэгээд зэмлэх, шүүмжлэх эсвэл угаасаа л гэж ярьвал ярьж болноо. Угаасаа чадсангүй…
Үргэлж миний ард бат зогссон, дэмжсэн бүх байгууллага, хувь хүмүүстээ чин сэтгэлээсээ талархлаа . Та нар бол жинхэнэ бусдын замыг гэрэлтүүлэх хүчтэй хүмүүс байсан шүү . Энэ зорилго хэзээ нэг өдөр биелэнэ тэр цагт өөрийнхөө хамгийн том хүндлэлийг та бүхэндээ үзүүлэх болноо” гэж ээ.
Гэхдээ тэрбээр бууж өгөлгүй визний хугацаа дуусахаас өмнө буюу 3-р сарын 22-оос өмнө дахин оролдож үзэн тоглолтоо үзэхийг зорьж байна. Визний материалыг нь Их Британийн шийдвэр гаргах эрх бүхий байгууллага хүлээн авсан гэнэ. Түүнд амжилт хүсье!
