Боксын спортын гурав дахь удаагийн дэлхийн цомын тэмцээнийг зохион байгуулах эрхийг манай улс баталгаажуулж чадлаа. Дэлхийн боксын холбооноос зохион байгуулдаг тус тэмцээн Улаанбаатар хотноо 2024 оны 9 сарын 23-26 хооронд UG Арена-д зохиогдоно. Дөрвөн өдөр үргэлжлэх тус тэмцээн нь Ази тивд анх удаа зохион байгуулагдаж буй боксын дэлхийн цомын тэмцээн бөгөөд Монголын боксын холбоо, Дэлхийн бокс хамтран зохион байгуулж байгаа гэдгээрээ онцлог юм. 

Дэлхийн боксын цомын тэмцээн нь эрэгтэй, эмэгтэй элит боксчид бүтэн жилийн турш хэд хэдэн үе шаттайгаар чансааны оноо цуглуулдаг ба жил бүр зохион байгуулахаар болсон шинэ тэмцээн юм. Монголд болох тус тэмцээнд эрэгтэй долоо, эмэгтэй зургаан жингийн ангилалд өрсөлдөж, ялсан тамирчид 2024 оны арван нэгдүгээр сарын сүүлээр Английн Шеффилд хотноо болох боксын дэлхийн цомын аварга шалгаруулах тэмцээнд оролцох эрхээ авах юм. 

Энэхүү арга хэмжээг Монгол Улс зохион байгуулна гэсэн мэдэгдлийг Дэлхийн боксын ерөнхийлөгч Борис ван дер Ворст манай улсад айлчлах үеэрээ Монголын боксын холбооны ахмад төлөөлөгчидтэй уулзалт хийхдээ мэдэгдсэн бөгөөд “Бид Ази тивд анх удаагаа дэлхийн боксын цомын тэмцээнийг зохион байгуулж байгаадаа баяртай байна. Монголын боксын холбоо уг тэмцээнийг зохион байгуулах хүсэл эрмэлзэл, тууштай үйл ажиллагаа явуулж байгаад маш их талархаж байна. Мөн дэлхийн боксыг тасралтгүй дэмжиж, спортод илүү сайн ирээдүйг бий болгож, Улаанбаатарт болох боксын дэлхийн цомын тэмцээн дээд зэрэглэлийн арга хэмжээ болох тул манай хамт олон болон Монголын боксын холбоотой хамтран Ази тивд энэ чухал тэмцээнийг хүргэхийг тэсэн ядан хүлээж байна” гэжээ. 

Улаанбаатарт болох энэхүү тэмцээн нь 2024 оны гурав дахь удаагийн боксын дэлхийн цомын аварга шалгаруулах тэмцээн бөгөөд ирэх нэгдүгээр сард Английн Шеффилд, дөрөвдүгээр сард АНУ-ын Колорадо мужуудад болох юм. World Boxing нь 2023 оны 4-р сард нээлтээ хийсэн бөгөөд бокс нь Олимпын төрлийн гол цөм хэвээр байлгах зорилготой юм.