Хятадын сагсан бөмбөгийн холбоо (CBA) ирэх жил болох Азийн цомын урьдчилсан шатны нэгдүгээр шатанд оролцох 14 тоглогчийн нэрсийг албан ёсоор зарласан. Тус шигшээ багийн ахлах дасгалжуулагч Серби улсын мэргэжилтэн Александр Жоржевичийн FIBA-ын албан ёсны сайтад өгсөн ярилцлагыг хүргэж байна. 

Өнөөдөр Шиан хотод Монгол улсын шигшээ баг тэдэнтэй эхний тоглолтоо хийх ба БНХАУ-ын шигшээ 2-р сарын 25-нд Парисын Олимпын эрхээ авсан, Азийн хүчирхэг багуудын нэг Японы шигшээтэй тоглохоор Токиог хотыг зорих билээ. БНХАУ-ын шигээ багийн жагсаалтад Жао Живэй, Абудушаламу Абудурексити, Ху Жинциу, Ху Мингхуан зэрэг олны танил туршлагатай тоглогчид багтсан бөгөөд ихэнх нь залуу шинэ тоглогчид гэдгээрээ онцлог байна. Эдгээр залуу ирээдүйтэй тоглогчдын дунд саяхан дэлхийн аваргад тоглосон Цүй Ёнши, төвийн тоглогч Юу Жайхао нар багтжээ. Тус багийн онцлох залуу тоглогчоор 2022 оны U18 Азийн цом, өнгөрсөн жил U19 насны ДАШТ-д оролцсоноос хойш ур чадвараараа олны анхаарлыг татсаар ирсэн өдгөө 18 настай Ян Хансен нэрлэгдэж байна. 

Гэхдээ тэд шигшээ багийн чухал тоглогчдын нэг Жоу Ци-ээс авхуулаад хэд хэдэн багтаа тогтмол тоглож байсан гол тоглогчид нь багтаагүй байна. "Гэмтэл болон бусад шалтгааны улмаас зарим тоглогчид сонгогдоогүй. Өнгөрсөн жилийн бэлтгэлд оролцож байсан зарим тоглогчийг сонгох ёстой байсан ч Хятадын тал болон дасгалжуулагчдын баг зөвлөлдсөний эцэст эцсийн жагсаалтад оруулаагүй" хэмээн ахлах дасгалжуулагч Жоржевич мэдэгджээ. 

FIBA-д өгсөн ярилцлагадаа:

-Шинэ залуу тоглогчдоо өсөж дэвжих, сайжруулахын тулд шигшээ багийн зүгээс тоглолтод оролцуулж, тэдэн туршлага хуримтлуулах хэрэгтэй. Улсынхаа нэрийн өмнөөс тоглох нь ямар их хариуцлага гэдгийг ойлгуулж, тэднийг сайжруулахад илүү түлхэц болно. Бид ялахыг зорьж, ирээдүйгээ бүгд ижил төсөөлөх хэрэгтэй.

-Бид бэлтгэлдээ олон шилдэг тоглогчдыг оролцуулсан бөгөөд ингэснээр зарим ахмад тоглогчид урьдчилан таамаглах боломжгүй гэмтэл бэртэлд алдаж магадгүй тул тухайн үед залуу тоглогчид байрлалыг нөхөж, багийнхаа ойлголцлыг үргэлжлүүлэн авч явах ёстой болно. 

-Бид эхний шатанд дээгүүр байр эзэлж, Азийн цомд оролцох эрхээ авах нь бидний гол зорилго. Үүний зэрэгцээ залуу тамирчдыг олон улсын тэмцээнд аль болох хурдан туршлага хуримтлуулах нь чухал болоод байна. 

-Зорилгодоо хүрэхийн тулд эхний ээлжид Монголын шигшээ, араас нь Япон, Гуам зэрэг улсуудыг хожих хэрэгтэй. Японы шигшээ Парисын олимпын эрхээ баталгаажуулсан хүчирхэг баг. Монгол, Гуам зэрэг өрсөлдөгчид ч маань илт сайжирч, бэлтгэлээ сайн базааж байгаа. Тиймээс бүгдэнтэй нь бүх хүчээ шавхан тоглох болно.

Хэмээн БНХАУ-ын эрэгтэй сагсан бөмбөгийн шигшээ багийн ахлах дасгалжуулагч Серби улсын мэргэжилтэн Александр Жоржевич Олон улсын сагсан бөмбөгийн холбоонд ярилцлага өгчээ. 

Дашрамд дурдахад Азийн цомын тэмцээний урьдчилсан шатанд 24 улсын шигшээ дөрөв дөрвөөрөө зургаан хэсэгт хуваагдсан ба баг бүр бусад 3 багтай нэг удаа гэртээ, нэг удаа зочлон тоглолт хийнэ. Хэсэг тус бүрээс эхний 2 байр эзэлсэн баг FIBA Asia Cup 2025 тэмцээнд оролцох эрхээ авах бөгөөд нийт 12 баг оролцоно. Харин хэсэг тус бүрээс гуравдугаар байр эзэлсэн зургаан баг эцсийн шатны шалгаруулалтад оролцох эрхтэй болно. Энэ тэмцээний шилдэг 4 баг 2025 оны FIBA Asia Cup тэмцээний үлдсэн байруудыг эзэлнэ.