Монголын дээд лигийн сүүлийн хоёр улирлын аварга Хасын Хүлэгүүд баг зүүн азийн супер лигийн эхний тоглолтоо Японы дээд лигийн хоёр удаагийн аварга Alvark Tokyo багийн эсрэг 10’000 хүний суудалтай “Keio Arena Tokyo” цэнгэлдэхэд Монголын цагаар 10-р сарын 08-нд 18:00 цагаас хийнэ.

Хасын Хүлэгүүд багийн тухайд:

Манай улсын шилдэг баг болох Хасын Хүлэгүүд баг 2004 онд үүсгэн байгуулагдсан. Хасын Хүлэгүүд багийн хувьд Монголын дээд лигт 9 удаа аварга авсан бөгөөд сүүлийн хоёр улирал дараалан түрүүлээд байгаа билээ. Хасын Хүлэгүүд баг энэ жил BCL East Asia тэмцээнд түрүүлж, BCL Asia тэмцээнд гуравдугаар байр эзэлсэн билээ.

Хасын Хүлэгүүд баг хэрхэн EASL тэмцээний эрхийг авч чадсан бэ?

EASL-ийн хувьд өнгөрсөн улиралд 6 улсын 10 баг өрсөлдөж байсан бол энэ жил цар хүрээгээ тэлж, 7 улсын 12 багтайгаар өрсөлдөхөөр болсон билээ. Япон улсаас 3 баг, Хятадын Тайвань улсаас 3 баг, БНСУ-аас 2 баг, Филиппин, Монгол, Хонгконг, Макао улсаас лигтээ аварга авсан 1 баг оролцохоор болсон билээ. Үүний дагуу манай улсын өнгөрсөн улирлын аварга Хасын Хүлэгүүд баг анх удаагаа энэхүү тэмцээнд оролцоход бэлэн боллоо. Хасын Хүлэгүүд баг тэмцээний С хэсэгт хуваарилагдсан бөгөөд Японы цомын тэмцээний дэд байрт шалгарсан Alvark Tokyo, Хятадын Тайваны TPBL лигийн аварга New Taipei Kings, БНСУ-ын дээд лигийн аварга Changwon LG Sakers багуудтай нэг хэсэгт орсон байна.

Хасын Хүлэгүүд багийн ахлах дасгалжуулагч:

Хасын Хүлэгүүд багийн ахлах дасгалжуулагчаар өдгөө 60 настай Thanasis Skourtopoulos энэ улирлаас удирдахаар болсон бөгөөд 2014-2017 онуудад Грекийн шигшээ багийн туслах дасгалжуулагч, 2017-2021 онуудад Грекийн шигшээ багийн ахлах дасгалжуулагчаар ажиллаж, 2019 оны ДАШТ-д шигшээ багаа удирдан 11-р байрт орж байв. Мөн тэрбээр 2023-2024 онд Азийн шилдэг улсуудын нэг болох Катарын шигшээ багийг удирдаж байсан.

Хасын Хүлэгүүд багийн EASL тэмцээнд өрсөлдөх бүрэлдэхүүн:

Alvark Tokyo багийн тухайд:

Alvark Tokyo баг 1948 онд үүсгэн байгуулагдаж, Toyota Pacers нэртэйгээр 1948-2000 оны хооронд лигт өрсөлдөж байсан бөгөөд 2000-2016 оны хооронд Toyota Alvark, 2016 оноос Alvark Tokyo нэртэйгээр өрсөлдөж байна. Тэдний хувьд Японы дээд лигт 2018, 2019 онуудад түрүүлж байсан бөгөөд BCL Asia тэмцээнд 2018 онд дэд байр, 2019 онд аварга авч байв.

Alvark Tokyo баг хэрхэн EASL тэмцээний эрхийг авч чадсан бэ?

EASL-ийн шинэчлэгдсэн форматын дагуу Японы дээд лигийн аваргын төлөө өрсөлдсөн хоёр баг дээр Японы эзэн хааны цом хүртсэн баг нэмэгдэж, Японы дээд лигээс гурван баг оролцох эрхтэй болсон. Alvark Tokyo багийн хувьд өнгөрсөн улирал Японы дээд лигт 44 хожил 16 хожигдолтой дөрөвдүгээр байраар дуусгасан бөгөөд Плей-Оффын эхний шатанд Chiba Jets багт хожигдож, улирлаа өндөрлүүлж байв. Гэсэн хэдий ч тэд Японы эзэн хааны цомын тэмцээнд аваргын төлөө шалгарч, дээд лигийн аваргын төлөө өрсөлдсөн Ryukyu Golden Kings багт хожигдсон ч Ryukyu Golden Kings баг EASL тэмцээний эрхээ авсан байсан учир дэд байрт шалгарсан Alvark Tokyo баг эрхийг авч чадсан юм.

Alvark Tokyo багийн ахлах дасгалжуулагч:

Alvark Tokyo багийн ахлах дасгалжуулагчаар 2022 оноос хойш Литва улсын мэргэжилтэн өдгөө 51 настай, Dainius Adomaitis ажиллаж байгаа бөгөөд 2016-2019 оны хооронд Литвийн шигшээ багаа удирдаж, 2019 оны ДАШТ-д шигшээ багаа удирдаж байв.

Alvark Tokyo багийн онцлох тоглогчид:

Alvark Tokyo баг энэ улиралд АНУ-ын тамирчин Brandon Davies-тэй гэрээ хийсэн бөгөөд түүний хувьд төвийн байрлалд тоглодог өдгөө 34 настай, 208см өндөр 2013 оны NBA-ий draft-д нэрээ өгсөн ч сонгогдож чадаагүй, NBA-ийн LA Clippers, Philadelphia 76ers, Brooklyn Nets багуудад тоглож байсан бөгөөд 2015-2025 онуудад Европын олон шилдэг багуудад тоглож байсан туршлагатай тоглогч юм. Түүний хувьд маргааш манай багийн эсрэг тоглолтод гэмтлийн улмаас оролцох боломжгүй болжээ.

Alvark Tokyo багт 2021 оноос хойш тоглож буй Испани болон Доминикан улсын иргэншилтэй, Sebas Saiz мөн онцлох тоглогч байх бөгөөд төвийн байрлалд тоглодог, 206см өндөр, 2017 оны NBA-ийн draft-д нэрээ өгсөн ч сонгогдож чадаагүй. Түүний хувьд 2019 оноос хойш Японы дээд лигт тоглож байгаа бөгөөд өнгөрсөн улиралд багийнхаа хамтаар улирлын 60 тоглолтод оролцож, 14,2 оноо, 6,7 самбар, 1,1 оновчтой дамжуулалт дундажлаж байв. Мөн тэрбээр шигшээ багийнхаа хамтаар 2022 оны Европын аварга шалгаруулах тэмцээнд өрсөлдөж, 2,3 оноо, 1,1 самбар дунджилж, аварга авч байсан. 

Alvark Tokyo баг энэ улиралд АНУ-ын тамирчин Marcus Foster-ийг мөн эгнээндээ элсүүлсэн бөгөөд 191см өндөр, 2018 онд NBA-ийн draft-д нэрээ өгсөн ч сонгогдож чадаагүй, БНСУ болон Европын шилдэг лигүүдэд тоглож байсан туршлагатай тамирчин юм. 2022 онд Housten Rockets багийн NBA-н G league-н баг болох Rio Grande Valley Vipers багийн хамтаар аварга авч, 16,8 оноо, 3,7 самбар, 3,8 оновчтой дамжуулалт дундажлаж байв. Мөн тэрбээр өнгөрсөн улиралд Грекийн Hapoel Tel Aviv багийн хамтаар Европын цомын тэмцээнд түрүүлсэн бөгөөд 11,7 оноо, 2,3 самбар, 2,1 оновчтой дамжуулалт дунджилсан байна.