Энэтхэгийн бөх Винеш Фогат Олимпоос хасагдсан дуулианы талаар 

Энэтхэгийн тамирчин Винеш Фогат 2024 оны Парисын Олимпын наадамд гайхалтай амжилтыг үзүүлж, Энэтхэг гэлтгүй дэлхий даяар түүний нэр цуурайтаж байсан ч өнөөдөр түүний тэмцээнд оролцох эрхийг бүр мөсөн хасжээ. Учир нь Чөлөөт бөхийн 50 кг-ын жинд өрсөлдөж байсан Винеш тэмцээний заасан жинг хэтрүүлсэн тул тэмцээнээс хасагдсан байна. Винеш нь ихэвчлэн 53 кг-ын жинд барилддаг байсан бол Парисын олимпод жингээ 50 кг болгон бууруулж орж ирсэн. Эхний өдөр үзүүлсэн жингээсээ хоёр дахь өдөр түүний жин 150 орчим граммаар илүү байсан тул түүнийг ийнхүү аваргын төлөөх барилдаанаас түдгэлзүүлсэн байна. 

Улмаар түүний ялсан бүх барилдааныг хүчингүйд тооцож, түүнд хагас шигшээд ялагдсан Кубын бөх Гузман Лопез алтан медалийн төлөө манай тамирчин Д.Отгножаргалыг ялсан АНУ-ын бөх Сара Энн Хилдербрандтай тулахаар болж байна. 

Энэ асуудлаар Энэтхэгийн Олимпын хороо давж заалдах өргөдлөө хэдийнээ гаргасан байна.

Энэтхэгийн Олимпын хороо “Энэтхэгийн багийнхан эмэгтэйчүүдийн 50 кг-ын жинд барилдсан Винеш Фогатыг хассан тухай мэдээг та бүхэнд дуулгаж байгаад харамсалтай байна. Шөнийн турш багийнхан маш их хүчин чармайлт гаргасан ч өнөө өглөө тэрбээр хэдхэн граммаар 50 гаруй кг жинтэй болжээ. Одоогоор бүрэлдэхүүнээс нэмэлт тайлбар хийхгүй. Энэтхэгийн баг Винешийн хувийн нууцыг хүндэтгэхийг хүсэж байна. Бид бусад тэмцээнүүдэд анхаарлаа хандуулмаар байна” хэмээн бичсэн байна. 

Винеш хоолоо хасаж, гүйж хөлсөө гаргах гэх мэт жиндээ орохын тулд чадах бүхнээ хийхийг оролдсон хэмээн Энэтхэгийн арын албанаас мэдээлсэн байна. Тэрбээр жингийн ангилалдаа багтана хэмээн найдаж шөнөжингөө унтсангүй. Энэтхэгийн албаны хүмүүс Олимпын хорооноос нэмэлт хугацаа өгөхийг хүссэн ч тэд зөвшөөрөөгүй байна. Өмнө нь Винеш Олимпын наадмын чөлөөт бөхийн төрөлд финалд шалгарсан анхны Энэтхэг эмэгтэй болж түүхэнд бичигдэж байсан юм. Гэхдээ хувь тавилан түүнд өөр зүйл бэлдсэн байжээ. Лхагва гарагийн өглөө түүнийг 150 граммаар илүүдэл жинтэй болох нь тогтоогдсон. Дүрмийн дагуу үүнийг зөвшөөрөхгүй байгаа тул эрхээ хасууллаа хэмээн Энэтхэгийн дасгалжуулагч хэлэв.

Винеш эрхээ хасуулсан тул Парисын наадамд ямар ч медаль авахгүй нутаг буцахаар болж Энэтхэгчүүд болон гэр бүл, ойр тойрныхондоо хүнд мэдээ дуулгалаа. Винешийн Парисын наадамд хийсэн анхны барилдаан нь хамгийн хэцүү нь байсан хэмээн хэлсэн. Тэрбээр олон улсын карьертаа нэг ч удаа ялагдаж үзээгүй, дэлхийн дөрвөн удаагийн олимпын аварга Японы бөх Юи Сусакитай барилдаж ялалт байгуулсан юм. Дараагийн шатанд Украйны бөх Оксана Ливачийг ялж, эмэгтэйчүүдийн 50 кг-ын жингийн хагас шигшээд өрсөлдөх эрхээ авсан ба түүний баярын нулимс хацран дээр бөмбөрч байсан цаг өчигдөрхөн. Хагас шигшээд Винеш Кубын бөх Юснейлис Гузман Лопезыг давснаар медаль авах нь баталгаатай болж, Олимпын финалд шалгарсан анхны Энэтхэг эмэгтэй бөх боллоо.Ийнхүү өнөө өглөө Винеш болон 1.4 тэрбум Энэтхэгчүүдийн мөрөөдөл нуран уналаа.