Үндэсний Сагсан бөмбөгийн 2023-2024 оны улирлын Плэй-Оффын өрсөлдөөн өндөрлөж, шигшээ тоглолтод аваргын төлөө өрсөлдөх багууд тодорлоо. Лигийн хамгийн баялаг түүхтэй гэгдэх Хасын Хүлэгүүд багийн 20 жилийн ой энэ жил тохиож буйгаараа онцлогтой. ОУХМ Б.Билгүүнээр удирдуулсан тэд эхний шатанд “Мөнхийн өрсөлдөгчид” гэгдэх BHC Гарьд багтай тоглосон. Уг тоглолт шийдвэрлэх долоо дахь тоглолтод шийдэгдэж, Хасын Хүлэгүүд баг ялалт байгуулав. Хагас шигшээд өнгөрсөн жилийн аварга буюу Эрдэнэт Майнерс багтай учраа таарсан. Гол тоглогчдоо гэмтэл бэртэлд алдсан Майнерс багийг Хасын Хүлэгүүд баг төвөггүйхэн таван тоглолтод 4-1 харьцаатай буулган авч аваргын төлөө тун эрт шалгарсан билээ. 

Нөгөө талд Бишрэлт Металл баг эхний шатанд “Сэлэнгэ Бодонс” багтай учраа тааран нэг ч хожигдол амсалгүй 4-0 харьцаатайгаар ялалт байгуулав. Хоёрдугаар шатанд энэ жилийн MVP М.Өлзий-Оршихоор удирдуулсан “IHC Apes” багтай Финалын шатанд шалгарахын төлөө өрсөлдөв. Цуврал ээлж дараалсан хожлоор эхэлж, 1-1 харьцаатай эхлэв. Үүний дараа хоёр дараалсан хожлыг Бишрэлт Металл баг авч 3-1 харьцаатай үнэмлэхүй ялж эхлэв. Түүний дараа багийн эзэн О.Мөнхжин ахлах дасгалжуулагч Лалег хангалттай ажиллаагүй хэмээн үзэж үүрэгт ажлаас нь чөлөөлсөн мэдэгдэл гаргаж шуугиан тариад амжсан. Үүний дараа Айпес баг 3-1 ээс эргэн ирж 3-3 харьцаатай болгон цувралыг улам бүр сонирхолтой болголоо. Улмаар өчигдөр буюу гуравдугаар сарын 06-нд шийдвэрлэх 7 дахь тоглолт өрнөж Бишрэлт Металл баг 87-75 харьцаатай буулган авлаа. Ийнхүү Бишрэлт Металл баг энэ жил дахин шигшээ цувралд шалгарлаа. 

Шигшээ цуврал сонирхолтой, гал гарсан өрсөлдөөн дунд өрнөх нь ойлгомжтой. Улиралд тэд хоорондоо хоёр удаа таарч тоглосон. Эхний тоглолтод Бишрэлт Металл баг 77-66 харьцаатай хожил байгуулсан бол дараагийн тоглолтод мөн адил 62-58 харьцаатай Металл багийн ялалтаар өндөрлөжээ. Мэдээж аваргын төлөөх тоглолт, улирлын тоглолт хоёр ялгаатай болох нь ойлгомжтой. Хасын Хүлэгүүд баг 20 жилийн ойдоо бэлэг барьж Аварга болох уу? Аль эсхүл Бишрэлт Металл баг өнгөрсөн жилийн дуусгаагүй ажлаа дуусах болов уу?