Хойд Америкийн сагсан бөмбөгийн лиг NBA-ийн Плей-оффын тоглолтууд үргэлжлэн явагдаж байна. Өрнөд бүсийн нэгдүгээр байраар шалгарсан Оклахома Сити Тандер баг эхний шатанд Нью Орлеанс Пеликанс багтай учраа таарсан ба цуврал тоглолтод нэг ч хожигдолгүй 4-0 харьцаатай ялалт байгууллаа. Ийнхүү тэд бүсийн хагас шигшээд шалгарсан ба Даллс Маверикс, Лос Анжелес Клипперс багуудын аль хожсонтой тоглох юм. Энэ нь Оклахома Ситигийн 2015-16 оны улирлаас хойших анхны Плей-оффын цувралын ялалт болсон байна.
Цувралын дөрөв дэх тоглолтын эхний хагас өрсөлдөөнтэй өрнөж, 44-43 харьцаатай эн тэнцүү эхлэв. Харин гуравдугаар үед Пелкансын алсын зайн шидэлтүүд амжилтай болж хагас онооны тэргүүлэлтэйгээр дөрөвдүгээр үеийг эхлүүлсэн байна. Харин дөрөвдүгээр үед өрнөд бүсийг тэргүүлэгчид онцгой байж тоглолтыг бүрэн хяналтдаа авсан ба үндсэн цагт 97-89 харьцаатай тэргүүлжээ. Тус тоглолтод Жэйлен Уиллиамс 24 оноо, 8 самбар, 4 оновчтой дамжуулалт, Шай Гилжиус Александр 24 оноо, 10 самбар, 3 оновчтой дамжуулалт тус тус гүйцэтгэж багаа тэргүүлжээ. Ийнхүү ОКС Тандер багийн хувьд энэ улирал онцгой амжилтуудаар дүүрэн өрнөж байна.
