АНУ-ын хүндийг өргөлтийн тамирчин Оливиа Ривз өнгөрсөн пүрэв гарагт эмэгтэйчүүдийн 71кг-ын жинд (157 паунд) түрүүлж алтан медалийг хүртсэн. Тэгвэл Ривз нь баасан гарагт ахин 117 кг (258 фунт) өргөж, олимпын дээд амжилтыг тогтоожээ. Тэрээр нийлбэр дүнгээр 262 кг (578 фунт) өргөж, алтан медалийн төлөө Колумбын тамирчин Мари Лейвис Санчес (мөнгө), Эквадор улсын тамирчин Анги Паола Паласиос Дажомес (хүрэл) нарыг буулган авсан байна.

Ингэснээр АНУ олимпын наадамд 24 жилийн дараа хүндийг өргөлтийн төрлөөр алтан медаль авч байгаа юм. Хамгийн сүүлд 2000 онд Австрали улсын Сиднейд болсон олимпод хүндийг өргөлтийн эмэгтэйчүүдийн төрөлд Тара Нотт-Каннгем алтан медаль хүртэж байжээ. Энэ нь эмэгтэйчүүдийн хүндийг өргөлтийн анхны олимп байсан юм.

21 настай Оливиа Ривз нь Чаттанугагийн Теннессигийн их сургуулийн оюутан бөгөөд өсвөр насандаа эцэг эхийнхээ эзэмшдэг CrossFit биеийн тамирын зааланд хүндийн өргөлтийн спортоор хичээллэж эхэлжээ. Тэрээр өмнө нь 2024 онд хүндийг өргөлтийн IWF world cup-д 71кг-ын жинд дэлхийн аварга, 2023 оны ДАШТ-д тус төрлөөр хүрэл медаль хүртсэн залуухан тамирчин юм. 

Мөн өнгөрсөн лхагва гарагт АНУ-ын эрэгтэйчүүдийн хүндийг өргөлтийн тамирчин Хэмптон Моррис 298 кг-ыг өргөж хүрэл медалийг хүртсэнээр 1984 оноос хойш хүндийг өргөлтийн төрөлд олимпын медаль хүртсэн анхны Америк хүн болжээ. 20 настай Моррис нь ихэнхдээ гэрийнхээ гражинд бэлтгэлээ хийдэг байсан гэнэ. Энэ нь түүний хувьд хувийн амжилтаа хурдан ахиулж, залуучууд, бага, ахлах насны ангилалд дэлхийн 10 дээд амжилтыг тогтооход нөлөөлжээ. Тэрээр эрэгтэйчүүдийн 61 кг-ын жинд өсвөр, насанд хүрэгчдийн дэлхийн дээд амжилтыг эзэмшдэг.

Харин Хятадын тамирчин Ли Фабин 310 кг-аар алт, Тайландын тамирчин Теерапонг Силачай мөнгөн медаль хүртсэн байна.