Манила хотын Mall of Asia Arena цэнгэлдэх хүрээлэнд 10,666 хөгжөөн дэмжигчдийн өмнө гуравдугаар байрын төлөө АНУ, Канадын шигшээ багууд гайхалтай тоглолт хийж нэмэлт цагт 127-118 харьцаатайгаар Канадын баг ялалт байгуулж хүрэл медалийн эзэд боллоо. Гуравдугаар байрын төлөөх тоглолт 1990 оноос хойш анх удаа нэмэлт цагт үргэлжилсэн тохиолдол болсон байна. 

Канад улс олон улсын сагсан бөмбөгийн салбарт хамгийн том амжилтаа авчирч ФИБА-гийн сагсан бөмбөгийн дэлхийн аварга шалгаруулах тэмцээний түүхэнд анх удаа медаль хүртсэн бол АНУ 1963, 1967, 1970 оноос хойш анх удаа дэлхийн аварга шалгаруулах тэмцээнд хоёр дараалан шагналын тавцанд гарч чадсангүй. 

Тоглолт Канадын шигшээ багын давамгайлалд дөрвөн үе өрнөж АНУ араас нь нэхсээр тоглолтын төгсгөлд Диллон Брукс хоёр торгуулийн шидэлт хийснээр 4 онооны зөрүү үүсэж хэдхэн секунд дутуу үлдэж бүгд л тоглолтын хувь заяатай эвлэрсэн байлаа. Гэвч АНУ Микал Бриджсд тийм бодол байсангүй түүнийг бөмбөг эзэмших үед Канад зориуд алдаа хийсэн ч тэрээр төсөөлөмгүй алхам хийж эхний шидэлтээ оруулж, хоёр дахь шидэлтийг санаатайгаар алдан өөрийнхөө самбараас бөмбөг авч, зүүн булангаас гурван онооны шидэлтийг унагаж тооны харьцааг 111-111 болгов. Улмаар нэмэлт цаг гарч. АНУ-ын хөгжөөн дэмжигчид ордон дүүрэн баярлацгааж байлаа. Гэвч энэ баяр тийм ч удаан үргэлжилсэнгүй нэмэлт цагт Канад тэр дундаа Шай Гелжис-Александр, Дилон Брүкс нар гайхалтай байж нэмэлт цагийг тэр чигт Канадчууд давамгайлсаар 127-118 харьцаатайгаар сагсан бөмбөгийн эх орон гэгддэг АНУ шигшээг буулгаж авлаа. Тус тоглолтын шилдэг тоглогчоор Диллон Брүкс тодорсон ба тэрээр алсын зайнаас 8 шидэхдээ 7-г нь оруулж нийт 39 оноо, 12 оновчтой дамжуулалт, 6 самбар авч эх орондоо анх удаа Сагсан бөмбөгийн дэлхийн аварга шалгаруулах тэмцээнээс медаль авчирлаа.