Милаукий Бакс багийн тоглогч Дэмиан Лиллард лигийн бүх цаг үеийн 3 онооны жагсаалтад дахин нэг шат ахиж 4-р байранд орж ирлээ. Өчигдөр болсон Милаукий Бакс, Лос Анжелес Лэйкерс багуудын хооронд болсон тоглолтод Дэмиан Лиллард алсын зайнаас 4 удаа оновчтой довтолж, алдрын танхимын гишүүн Режи Миллерийг гүйцсэн байна.

Режи Миллер 1389 тоглолтод оролцохдоо 2560 удаа алсын зайнаас амжилттай довтолсон амжилтаар 4-р байранд бичигддэг байсан бол Дэмиан Лиллард ердөө 829 тоглолтод оролцож 2571 удаа 3 онооны шидэлт амжилттай болгож түүний амжилтыг эвджээ. Түүний дээр байгаа гурван тоглогчид нь Жэймс Харден 2915, Рэй Аллен 2973, Стефен Көрри 3680 удаа алсын зайнаас амжилттай гүйцэтгэсэн тоогоор тэргүүлж байна. 

Лиллард 9 дэх улиралдаа NBA-д тоглож байгаа ба нэг улиралд 200-аас доошгүй удаа 3 онооны шидэлт амжилттай гүйцэтгэж байна. Лиллард энэ жил бүх оддын тоглолтын MVP мөн алсын зайн шидэлтийн аварга авсан нь түүний хувьд ямар онцгой жил болохыг харуулж байна. 2021 оны аварга Милаукий Бакс багтай энэ жил нэгдсэн Лиллард 24.7 оноо, 4.4 самбар, 6.9 оновчтой дамжуулалт дунджил байна. Баг нь 42-23 амжилттайгаар Дорнод бүсийн хоёрдугаар байрт жагсаж, Плэй-Оффт өрсөлдөх нь улам бүр баталгаатай болж байна.