21 аймгийн бөхийн галууд хаана, хаана гарч байгаа товч жагсаалттай танилц

 

Тулгар төрийн 2233 жил, Их Монгол Улсын 818 жил, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ойн их баяр цэнгэл наадам хэдхэн хоногийн дараа эхлэх гэж байна. Энэ жил сонгуультай учраас бөхчүүд оройтон галдаа гарчээ. Нутаг нутгийн бөхчүүд галдаа хаана, хаана гарсан болоод сорилго наадмууд хэзээ болох тухай мэдээллийг хүргэж байна. 

Ховд аймгийн Ховд бөхийн дэвжээнийхэн О.Хангай аварга, Б.Бат-Өлзий заан, Б.Пүрэвсайхан заан тэргүүтэй бөхчүүд энэ жил Сүүж уулын Сүүж амралтын газар бэлтгэлээ базааж байна. Архангай аймгийн Бөхбилэгт дэвжээнийхэн Төв аймгийн Баянчандмань сумын нутагт Сүүж уулын зүүн аманд байрлажээ. Р.Пүрэвдагва арслан, О.Мөнх-Эрдэнэ харцага, Б.Зоригтбаатар харцага нар дэвжээгээ тэргүүлэн бэлтгэлээ базааж байна. Увс аймгийн Увс нуур дэвжээний бөхчүүд Харзтайд галд гарчээ. Н.Батсуурь, П.Бүрэнтөгс Аваргууд галаа манлайлжээ. Өвөрхангайн хүчтэнүүд энэ жил Бугын сангийн аж ахуйд бэлтгэлээ хийж байна. Төр хурахын аманд Г.Эрхэмбаяр аваргаар ахлуулсан Г.Элбэг харцагын шавь нар бэлтгэлээ хийж байгаа аж. Говь-Алтай аймгийн хүчтэнүүд Мандал амралтад бэлтгэлээ хийж байгаа. Цонжин болдогоос хойш даваад л орчих газар аж. Завхан аймгийн бөхчүүд энэ жил Отгонтэнгэр хайрхныхаа өвөрт Завхан аймгийн Отгон суманд бэлтгэлээ базааж байна. 

Ингээд 21 аймгийн бөхийн галууд хаана, хаана гарч байгаа товч жагсаалтыг хүргэе.

1. Архангай аймгийн Бөхбилэгт дэвжээ - Төв, Баянчандмань, Сүүж уулын зүүн ам

2. Баян-Өлгий аймгийн Өлгийн хүчтэн дэвжээ - Төв, Эрдэнэ, Харзтай

3. Баянхонгор аймгийн Ихбогд дэвжээ - Улаанбаатар, Найрамдал

4. Баянхонгор аймгийн Хонгорнутаг дэвжээ - Баянхонгор аймаг

5. Булган аймгийн Булган хан дэвжээ - Түргэний гол, Бугын сангийн аж ахуй

6. Говь-Алтай аймгийн Хантайшир дэвжээ - Төв, Эрдэнэ

7. Дархан-Уул аймгийн Дарханхайрхан дэвжээ - Дархан-Уул аймаг

8. Дорноговь аймгийн Хутагтын хүчтэн дэвжээ - Түргэний гол, Бугын сангийн аж ахуй

9. Дорнод аймгийн Дорнын хүчтэн дэвжээ - Төв, Баянчандмань

10. Дундговь аймгийн Хурхарцага дэвжээ - байршил тодорхой бус

11. Завхан аймгийн Завхан дэвжээ - Түргэний гол, Бугын сангийн аж ахуй

12. Өвөрхангай аймгийн Их Монголын Хүчтэн дэвжээ - Түргэний гол, Бугын сангийн аж ахуй, 

13. Өмнөговь аймгийн Говийн хүчтэн дэвжээ - Төв, Эрдэнэ, Харзтай

14. Сүхбаатар аймгийн Жавхлант дэвжээ - байршил тодорхой бус

15. Сэлэнгэ аймгийн Таванхан дэвжээ - Налайх, Их ам

16. Төв аймгийн Дүнжингарав дэвжээ - Төв, Зуунмод

17. Увс аймгийн Увснуур дэвжээ - Төв, Эрдэнэ, Харзтай

18. Ховд аймгийн Ховд дэвжээ - Төв, Баянчандмань, Сүүж уул

19. Хөвсгөл аймгийн Хөвсгөлийн хүчтэн дэвжээ - Хөвсгөл, Мөрөн

20. Хэнтий аймгийн Хан Хэнтийн аварга дэвжээ - Улаанбаатар, Аргүнт

21. Баатар Хангарди дэвжээ - Улаанбаатар, Өвөржанчивлан

22. Их шавь дэвжээ - Улаанбаатар, Төр хурах

Мөн өчигдрөөс буюу 07.02-ны өдрөөс эхэлж нутаг нутгийн дэвжээний сорилго барилдаанууд эхлээд байна. Өнөөдөр Архангай, Булган аймгуудын сорилго барилдаан болж байгаа бол маргааш Өвөрхангай, Дундговь, Сэлэнгэ аймгуудын сорилго барилдаан болно. Өмнөговийн сорилго барилдаан нөгөөдөр болох бол Увс аймгийнх долдугаар сарын 5-ны өдөр товлогджээ.