Францын нийслэл Парис хотноо зохион байгуулагдаж буй зуны 33 дахь удаагийн олимпын наадам үргэлжилж байна.

Өнөөдөр манай 5 тамирчин 4 төрөлд өрсөлдөж байна. Тэдний нэг болох Азийн АШТ-ий мөнгө, хүрэл медальт, Сербийн Гранпри тэмцээний хүрэл медальт ОУХМ О.Есүгэн өнөөдөр 50м-ын урт бууны гурван байрлалаас буудах дасгалд өрсөлдөж медалийн төлөөх өрсөлдөөн шалгарлаа. Тэрбээр 50м-ын урт бууны гурван байрлалаас буудах дасгалын урьдчилсан шатанд дэлхийн шилдэг 32 тамирчинтай өрсөлдөж, 589 оноо цуглуулж 4-р байраар шалгарснаар финалын шатанд медалийн төлөө сэц мэргэнээ сорихоор боллоо. Энэхүү амжилт нь Монгол улсын 50м-ын урт бууны төрөлд Монгол улсын цоо шинэ амжилт болж байна.

Өмнө нь буудлага спортын эмэгтэйчүүдийн 10 метрийн хийн урт бууны дасгалын төрөлд 44 тамирчин өрсөлдсөнөөс манай тамирчин О.Есүгэн 627.6 оноогоор 18-р байрт шалгарсан. Тэгвэл маргааш 50м-ын урт бууны гурван байрлалаас буудах дасгалд медалийн төлөө 15:30 цагаас өрсөлдөхөөр болж байна. Урьдчилсан шатанд түүний дээр АНУ, БНХАУ, Швецарийн тамирчид бичигджээ.

ОУХМ Оюунбатын Есүгэн өмнө нь Токио 2021 зуны олимпын наадмын хийн урт бууны 10 метрийн дасгалд 624 оноогоор 25 дугаар байранд орсон бол 50 метрийн урт бууны 3 байрлалаас буудах дасгалд 1158 оноогоор 27-байрт шалгарч байжээ. 2023 оны Азербайжаны нийслэл Баку хотноо буудлагын 59 дэх удаагийн дэлхийн аварга шалгаруулах тэмцээнд 50 метрийн төрөлд гурван байрлалаас буудаж, олимпын эрхээ авч байсан удаатай. Түүний 2022 онд Египетийн Каир хотноо болсон дэлхийн аварга шалгаруулах тэмцээнд гаргасан амжилтыг нь үнэлэн Монгол Улсын биеийн тамир, спортын улсын хорооны тэргүүний ажилтан цол тэмдгээр шагнаж байжээ.