Цахим спортын томоохон төлөөллүүдийн нэг Counter Strike-ийн шинэчлэгдсэн хувилбар "CS2"-ийн анхны Мэйжор тэмцээн Дани улсын Копенхаген хотноо энэ сарын 17-оос эхэлсэн. Түрүүлсэн баг 500 мянган долларын шагналтай тус тэмцээнд тив бүрийн шилдэг 24 баг өрсөлдөж байна. Манай "The MongolZ" баг Ази, номхон далайн бүст багтах орнуудын төлөөлөн оролцож байна.
MongolZ-ын хувьд энэхүү том тэмцээнд оролцохын тулд Сербид байрлаж, Европын шилдгүүдтэй интернэтийн асуудалгүй бэлтгэл хийсэн. "The MongolZ" багийг энэ удаагийн Мэйжорт сайн өрсөлдөж, хасагдах шатанд оролцох боломжтой хэмээн олон хүн бодож буй. Тэмцээний эхний өдөр Туркийн "Eternal Fire", Данийн "ECSTATIC" багуудад хожигдож, 0-2 гэсэн тааруу амжилттай эхлүүлсэн. Тэгвэл өчигдөр хожигдох эрхгүй тоглолтыг Оросын "AMKAL" багийн эсрэг хийв. Эхний үед "The MongolZ" "Nuke" дээр 13-2 гэсэн харьцаатай хожиж, тэргүүллийг авсан ч "Mirage" дээр 8-13 гэсэн харьцаатай хожигдож, шийдвэрлэх тоглолт "Inferno" дээр явахаар болсон. Шийдвэрлэх тоглолт дээр 13-10 гэсэн харьцаатай хожиж, тэмцээнээ үргэлжлүүлэхээр болов.
