Эмэгтэйчүүдийн хөлбөмбөгийн дэлхийн аварга шалгаруулах ес дэх удаагийн тэмцээн Австрали болон Шинэ Зеланд улсад долоодугаар сарын 20-ны өдөр эхэлсэн билээ. Бүтэн сар үргэлжлэх уг тэмцээнд нийт 32 орны баг тамирчид өрсөлдсөнөөс хагас шигшээд өрсөлдөх дөрвөн баг тодроод байна. 2023 оны эмэгтэйчүүдийн дэлхийн аваргын цомыг өргөх боломжтой болсон дөрвөн багийг танилцуулж байна

Испани 

Испаний шигшээ баг өнгөрсөн дэлхийн аваргад үзүүрлэсэн Нидерландийн шигшээтэй хагас шигшээд шалгарах эрхийн төлөө баасан гарагт тоглосон ба үндсэн цагт 1:1 ийн харьцаатай тэнцсэн ч Салма Параллуело-ын нэмэлт цагт хийсэн довтолгоогоор 2:1 харьцаатай тоглолтыг тэргүүлж Испанийн шигшээ баг хагас шигшээд өрсөлдөх тасалбараа хамгийн эхэнд халаасалжээ. Ийнхүү Испаний шигшээ эмэгтэйчүүдийн багийн түүхэндээ анх удаа хагас шигшээд шалгарсан байна.

Швед

Дөрвөн удаагийн Дэлхийн аварга АНУ-ыг шөвгийн 16-д буулган авч томоохон шуугиан тариад байсан Шведийн шигшээ баг хагас шигшээд шалгарах эрхийн төлөө 2011 оны аварга Японы шигшээ багтай оноолт таарсан. ДАШТ-ы хагас шигшээд Швед улсын эмэгтэй шигшээ баг тав дахь удаагаа тоглож байгаа ба хамгаалагч Аманда Илестедт 32’ дахь минутад шигшээ багаа тэргүүлэх боломжийг авчирч оноог 1:0 болгосон бол Филиппа Анжелдал хоёрдугаар хагаст торгуулийн цохилтоор 2:0 харьцаатай болгож Шведийн шигшээ итгэл төгс тоглолтыг тэргүүлж байсан бол Японы шигшээгийн довтолгоо улам бүр ширүүсэж Рико Уэки 76’ дахь минутад торгуулийн цохилтоо алдаж, 11 минутын дараа түүнийг сэлгээгээр орлон гарсан Хонока Хаяшиги гоол оруулан 2:1 харьцаатай болгосон ч тоглолтыг тэнцүүлэхэд нэгэнт оройтсон байлаа. Ингэснээр Шведийн шигшээ баг хагас шигшээд шалгарч Испаний шигшээ багтай наймдугаар сарын 15-ны өдөр Шинэ Зеландийн Эдэн Парк ордонд финалд шалгарах эрхийн төлөө тоглох юм.

Австрали

Хамтран зохион байгуулагч орон болох Австрали улсын баг бямба гарагт нутгийнхаа цэнгэлдэх хүрээлэн болох Ланг Парк хүрээлэнд Францын шигшээ багтай учраа таарсан. Үндсэн болон нэмэлт цагт аль ч багийн тор хөдлөлгүй хуурай тэнцэж пеналтигаар ялагчийг тодруулахаар болсон бол Австралийн шигшээ багийн хаалгач Маккензи Арнольдын гайхамшигтай хаалтуудын ачаар 7:6 харьцаатайгаар ялалт байгуулж зохион байгуулагч орон анх удаа хагас шигшээд шалгарсан түүхэн амжилт үзүүллээ.

Англи

Европын аварга Английн шигшээ баг энэ тэмцээний хамгийн дутуу үнэлэгдсэн ч шөвгийн наймд шалгарч чадсан Колумбийн шигшээтэй учраа таарсан. Колумбийн довтлогч Лейси Сантос энэхүү тоглолтын салхийг хагалж гоол оруулан шар, цэнхэр хувцаст хөгжөөн дэмжигчдийг баярлуулаад байсан ч эхний хагасын нэмэлт цагт Лаурэн Хэмп тоглолтыг тэнцүүлж хоёрдугаар хагаст Алессиа Руссо тэмцээний хожлын гоолыг оруулснаар 2:1 харьцаатайгаар Английн шигшээ баг хагас шигшээд шалгарчээ. Ингэснээр Английн шигшээ болон зохион байгуулагч Австралийн шигшээ багууд шигшээ тоглолтод шалгарах эрхийн төлөө наймдугаар сарын 16-нд Авсрталын Синдей хотын төв ордонд тоглох юм.

С.Өсөхбаяр