2023-2024 оны сагсанбөмбөгийн Үндэсний дээд лигт энэ жил 13 баг оролцож буйгаараа онцлогтой болж байна. Эхний тойргийн байдлаар багууд нийтдээ 12-14 тоглолт хийсэн байна. 13 болон 14-р байранд Шутис Шаркс болон Дархан Юнайтед багууд бичигдэн сүүл мушгиж яваа ба Дархан Шутис Шаркс болон Өмнөговь Ёлууд багийг тус тус хожив. Шутис Шаркс баг Улаанбаатар ТЛЖ, Өмнөговь Ёлуудыг хожиж бусад тоглолтдоо ялагдал хүлээжээ. 

Хөгжлийн лигээс дэвшин орсон Өмнөговь Ёлууд, Сүмбэр Цамхаг Монголианс багууд тус тус 4 хожил 9 хожигдолтойгоор 10, 11-р байруудад бичигдэж байна. Улирлыг 3 хожилтойгоор эхлүүлсэн Сэлэнгэ Бодонс сүүлийн тоглолтуудад багагүй ялагдал хүлээсэн. Тэд сүүлд Улаанбаатар ТЛЖ багийг хожиж 5 хожил байгуулсан бол Налайх Бизон, IHC Apes багуудад ялагдал хүлээж 5-9 харьцаатай 9-р байрт жагсаж байна. 

Улирлыг 3 хожилтойгоор эхлүүлсэн Сэлэнгэ Бодонс сүүлийн тоглолтуудад багагүй ялагдал хүлээсэн. Тэд сүүлд Улаанбаатар ТЛЖ багийг хожиж 5 хожил байгуулсан бол Налайх Бизон, IHC Apes багуудад ялагдал хүлээж 5-9 харьцаатай 9-р байрт жагсаж байна. 

Завхан Бродерс баг мөн адил 5 хожил 9 хожигдолтой байгаа ба тэд Сэлэнгэ Бодонсийг эцсийн мөчид 102-104 харьцаатай хожсон тул ийнхүү 8-р байрт бичигдэж байна. Өмнөх жилийн легионер том залуу Даймонд Стөүнийг дахин багтаа нэгтгэсэн ба тэрбээр 56 оноо авч улирлын дээд үзүүлэлт тогтоогоод байна. 

Мөн хөгжлийн лигээс дэвшин орсон ТЛЖ Ондилт баг хашир туршлагатай Этнони Харрис, Маркус Хаммондс нарыг эгнээндээ нэгтгэсэн. Түүний дараагаар Хасын Хүлэгүүдийг 71-69, Завхан Бродерс багийг 87-84 харьцаатайгаар тус тус хожиж нийт 6 хожилтойгоор 7-р байранд жагсаж байна. 

Ямар ч багтай өрсөлдөхөөс айдаггүй Налайх Бизон багийн залуус энэ жил мөн л адилхан байж, өмнөх жилийн легионер Жорж Уиллиамс болон Энтонио Хестер зэрэг тоглогчдыг гадаад зах зээлээс авчирсан. Эрдэнэт Майнерс багаас Т.Санчирыг багтаа нэгтгэж энэ улирлын монгол тамирчдын солилцооны хамгийн том шуугиан тарьсан билээ. Тэд сүүлийн гурван тоглолтдоо Өмнөговь Ёлуудыг 101-90, Сэлэнгэ Бодонсыг 77-101 харьцаатай тус тус хожсон ч өчигдөр Завхан Бродерс багт 85-77 харьцаатай хожигдож 7-7 харьцаатай 6-р байранд бичигдэж байна. 

А.Ананд, Б.Билгүүн нарыг эзгүйд залуу тоглогчдоороо улирлыг эхлүүлсэн Хасын Хүлэгүүд баг сүүлийн тоглолтууддаа онцгой байж Шутис Акулууд, Сүмбэр Цамхаг Монголианс зэрэг багуудыг хожсон ба энэ улирлын хамгийн гайхалтай тоглолтуудын нэгийг тольлуулж нэг ч хожигдол амсаагүй явсан Эрдэнэт Майнерс багийг 71-76 харьцаатайгаар буулгаж авсан билээ. Гэмтэл бэртэлгүй бол ямар аюултай баг гэдгээ харуулсан тэд 7-6 амжилттайгаар 5-р байрт бичигдэж байна. 

Өнгөрсөн жилийн дэд аваргууд болох Бишрэлт Металл баг энэ жил Д.Баясгалан, Э.Дөлгөөн нараар хүчээ зузаатган Жахилл Трипп болон Сербийн туршлагатай дасгалжуулагчаар удирдуулан улирлаа үргэлжлүүлж байна. Тэд хүснэгтийн дээр байгаа Эрдэнэт Майнерс, IHС Apes, BCH Гарьд /2 удаа/ багуудад хожигдсоноос өөр хожигдол амсалгүй 9-4 харьцаатай 4-р байрт жагсаж байна. 

Лигийн Топ багуудын нэг BCH Гарьд болон IHC Apes багууд ердөө хоёр хожигдолтой яваа ба Гарьдууд Apes болон Майнерст тус тус хожигдож 3-р байрт, Apes мөн адил Майнерст болон Дархан Юнайтед багуудад хожигдож 2-р байранд тус тус жагсаж байна. Сонирхуулахад IHC Apes баг Энтони Смитын хажууд өмнөх жил Тэнүүн Өлзий Металл багт тоглож асан Кристофер Блэйкийнг багтаа нэгтгэсэн бол BCH Гарьд баг Девой Жосеф дээр Жеррикойл Хеллемс хэмээх легионероор хүчээ зузаатгажээ. 

26 дараалан хожигдолгүй явсан Эрдэнэт Майнерс баг Хасын Хүлэгүүд багт хожигдсон ч тэд улирлыг 12-1 харьцаатай тэргүүлсэн хэвээр байна. Өмнөх жилийн аваргуудаас Т.Санчирыг Налайх Бизон багт алдсан ч үндсэн систем алдагдалгүй ямар ч багийг эцсийн мөчид буулган авсаар улирлын хагаст тулж ирлээ. Нэг харамсалтай мэдээ дуулдсан нь багийн гол тоглогч Пендарвис Уиллиамс цавьны гэмтлийн улмаас хэдэн тоглолт өнжих магадлалтай хэмээн мэдэгджээ. Ийнхүү 2023-2024 оны Үндэсний дээд лигийн хоёрдугаар тойргийн хагас өндөрлөж 12-р сарын 25-нд дараагийн тоглолтуудаар үргэлжлэх нь ээ.