Хүн төрөлхтний эв нэгдлийн бэлэг тэмдэг, баяр цэнгэлийн манай болсон олимпын их наадам Францын нийслэл Парис хотноо 13 дахь өдрөө үргэлжилж байна. Манай улсаас усанд сэлэлт, бокс, жүдо, дугуй, буудлага зэрэг спортын төрлүүдээр олон манай тамирчид дэлхийн шилдгүүдтэй өрсөлдөж, Монгол улсын олимпын түүхэн дэх амжилтуудыг ахиулсаар буй. Олимпын дараагийн медалийн найдвар гэгдэж буй чөлөөт бөхийн төрөл гурав дахь өдрөө үргэлжилж байна.

.Өнөөдөр 57 кг-ын жинд өрсөлдсөн Болдсайханы Хонгорзул эхний шатанд БНХАУ-ын тамирчин, анхны олимподоо оролцож буй Кешин Хунтай учраа таарав. Барилдаан тун хэцүү эхэлж 8-0 харьцаатай ялагдсан ч Б.Хонгорзул маш сайн тэмцэж, оноог 8-6 болтол ойртуулав. Кешин Хун тун овсгоотой байж дахин манай тамирчнаас оноо салгасаар 12-6 болгоход Хонгорзул мөчөөгөө өгөлгүй оноог ойртуулсаар байлаа. Гэвч онооны давамгайллаа хамгаалж барилдсан Кешин Хун эцсийн мөчид 16-12 харьцаатайгаар манай бөхийг буулгаж авлаа. Одоо Кешин Хун финалд шалгарвал Б.Хонгорзул дагаж барилдана. Финал шалгарах эсэх нь өнөөдөр шөнө шийдэгдэнэ. 

Гэрэл зургийг: Ч.Ганбат

Чөлөөт бөхийн эрэгтэйчүүдийн салхийг хагалж 86 кг-ын жинд ОУХМ Б.Бат-Эрдэнэ Чэмп Де Марс Аренад зодоглолоо. Тэрбээр сугалаагаар хүндхэн учраа буюу Дэлхийн хошой хүрэл, 2023 оны мөнгөн медальт Орос гаралтай Азербайжаны бөх Осман Нурмагомедовтой эхний тойргийн барилдахаар болсон. Барилдаан Азербайжаны бөхийн давамгайллаар эхэлж 8-0 харьцаатай хүнд байдалд оров. Улмаар оноо нөхөж 8-2 болсон ч өрсөлдөгчийн арга мэх, Б.Бат-Эрдэний хүссэн барилдаанд оруулж чадахгүй байлаа. Ийнхүү цаг дуусахад оноо авч чадалгүй явсаар 11-2 харьцаатай ялагдал хүлээлээ. Мөн адил түүний дагах эсэх нь Осман Нурмагомедовоос хамаарахаар болж байна.