FIBA 2023 сагсан бөмбөгийн дэлхийн аварга шалгаруулах тэмцээний хоёрдугаар тойрогт тоглох 16 баг тодорлоо. Лхагва гарагийн хэсгийн сүүлийн тоглолтоор Бразил, Гүрж, Грек, Пуэрто-Рико, Серби, Словени багууд хожил авч хоёрдугаар шатанд шалгарсан. Харин Австрали, Канад, Доминикан, Герман, Итали, Латви, Литва, Монтенегро, Испани, АНУ зэрэг багууд хэдийн шалгарах эрхээ халааслаад байсан бөгөөд аваргын өрсөлдөөнөөс Франц, Финланд, Шинэ Зеланд зэрэг хүчирхэг багуудыг хасаад байна. 

Хоёрдугаар тойргийн тоглолт Жакарта, Манила, Окинава хотод үргэлжлэн явагдана. Бүх багууд 2-р шатанд эхний тойргийн амжилтаа авч, шөвгийн наймд үлдэхийн төлөө өрсөлдөх бөгөөд дөрвөн хэсгийн шилдэг хоёр баг эцсийн шатанд шалгарна.

Ямар хэсэгт хуваагдсаныг танилцуулбал:

Group 1: Серби, Бүгд Найрамдах Доминикан, Итали, Пуэрте Рико

Бүгд Найрамдах Доминикан Улс ямар ч багтай тоглож, хэнийг ч ялж чадна гэдгээ  А хэсгийн тоглолтуудад хангалттай харуулсан. Одоо тэд хүчирхэг Сербийн багтай хэрхэн үзэхийг харахын зэрэгцээ өөрсдийн тивийн өрсөлдөгч Пуэрто Рикотой тоглох болно. Итали Доминиканчуудтай дахин таарсан ба тэд Манила хотод хэсгээс гарах үгүйгээ шийдэх тоглолтыг хийх болно.  

Group 2: АНУ, Литва, Грек, Монтенегро

АНУ дэлхийн аваргын цомыг эргүүлэн авах аялалдаа маш амжилттай яваа. В хэсэгт нэг ч ялагдал амсаагүй тэд D хэсгээс 3-0 амжилттай гарч ирсэн Литва, удаах байраар шалгарсан Монтенегрогийн баг буюу дахин Европын хоёр багтай тоглох юм. Тэдний тоглолт мөн адил Манила хотод болно. 

Group 3: Словени, Герман, Австрали, Гүрж

Япон улсын Окинова хотод Австрали, Герман, Словени гэсэн гурван том баг шөвгийн наймд хоёр байрын төлөө тулалдах тул тоглолт бүр үзүүштэй чухал тоглолтууд болох учиртай. Герман, Словени хоёр тус тусын E, F хэсгийг тэргүүлсэн Австрали Германы багт эцсийн мөчид харамсалтайгаар ялагдан хоёрдугаар байраар шалгарсан. Лука Дончич, Деннис Шрөдер, Патти Миллс гэсэн шилдэг тоглогчдын тулааныг энэхүү хэсгээс үзэж болох нь. 

Group 4: Канад, Испани, Бразил, Латви

Өмнөх Дэлхийн аварга Испани H хэсгээс, залуу бөгөөд чадварлаг Канад, Францыг мулталж чадсан Латви, Испаний шигшээ багтай эхний тойрогт маш сайн тоглолт үзүүлсэн Бразил нар энэ хэсэгт таарсан байна. Мэдээж онцлох багууд бол хамгаалалт системээрээ онцгой Испани болон шинэчилсэн жагсаалтаар нэгдүгээрт бичигдэж буй Канад нар юм. 

Зөвхөн Дэлхийн аварга гэлтгүй багууд Олимпын эрхийн төлөө өрсөлдөх бөгөөд Австрали улс далайн чансааны шилдэг баг гэдгээ баталгаажуулж Парис 2024 тэмцээнд оролцох долоон эрхийн эхний тасалбарыг авсан бол Африк, Азийн хамгийн сайн амжилт үзүүлсэн тус бүр нэг баг, Европ, Америк тивээс шилдэг амжилт үзүүлсэн тус бүр хоёр баг 2024 оны Олимпын тасалбараа авах юм.

Хоёрдугаар хэсгийн тоглолтуудын хуваарийг энд дарж үзнэ үү.