Дэлхий дээрх хамгийн хачирхалтай тэмцээнүүдийн нэгд тооцогддог Хот Дог хамгийн ихийг идэх уралдааны домгууд болох Жой Честнат, Такеру Кобаяши нар энэ зун дахин өрсөлдөнө. Олон улсын видео дамжуулалтын томоохон компани Netflix уг тэмцээнийг зохион байгуулж байгаа ба "Chestnut vs. Kobayashi: Дуусаагүй тооцоо" хэмээн нэрлэжээ.

Жой Честнат нь 2021 оны Хот-Дог идэх уралдаанд 10 минутын дотор 76 ширхгийг идсэн амжилтаар дэлхийн рекордыг эзэмшдэг. Мөн хамгийн олон удаа буюу 16 удаа түрүүлсэн амжилтаар мөн адил дээд амжилт эзэмшдэг нэгэн. 

Харин японы домог Кобаяши 2000-аад оны эхээр тус тэмцээнд ноёрхож байсан бөгөөд 2001-2006 он хүртэл зургаан жил дараалан тус тэмцээнд түрүүлсэн. Тэдний өрсөлдөөн 2005, 2006 оноос үүсэлтэй ба Честнат тус жилүүдэд Кобаяшид ялагдаж байсан бөгөөд 2007 онд анх удаагаа түрүүлсэн удаатай. 2009 оноос хойш Кобаяши тус тэмцээнээс зодгоо тайлсан байна. 

Тус тэмцээний талаар өдгөө 40 настай Жой Честнат "Энэ тэмцээнд анх орсон цагаас Кобаяши миний хамгийн ширүүн өрсөлдөгч байсан. Намайг амжилт үзүүлэхэд тэр л нөлөөлж байлаа. Шүтэн бишрэгчид бидний өрсөлдөөний шинэ бүлгийг удаан хүлээсэн байх. Хүмүүст хүссэнийг нь өгөх цаг нь болсон!" хэмээн мэдэгджээ. 

Харин Такеру Кобаяши "Би түүнийг сүүлчийн удаа болгож тавьсныхаа дараа зодог тайлна. Энэ өрсөлдөөн нэлээд удаан үргэлжилж байна. Netflix дээр Жойтой өрсөлдөх нь дэлхийн өнцөг булан бүрд байгаа шүтэн бишрэгчид маань намайг түүнийг ялахыг шууд харж чадах нь байна" гэжээ. Тэмцээний ирэх есдүгээр сарын 2-нд зохиогдох ба Netflix-ээр шууд дамжуулагдах юм.