Интер Майамигийн довтлогч Лионель Мессиг АНУ-ыг "атгаж" байна гэжээ. Месси зун Парис Сент-Жерменээс Интер Майами багийн эгнээнд элссэний дараа Америкт өөр уур амьсгал бий болсон. Тус улсын хөлбөмбөг өмнө нь байсан хэдий ч хэзээ ч ийм байгаагүйг шинжээчид хэлж байна. 

Түүний АНУ руу шилжсэн нь Мессигийн Барселонагаас Парис руу явсантай харьцуулахад тооцоотой, сайн төлөвлөсөн үйлдэл гэж дүгнэжээ. Ирэх жил Копа Америка, мөн финалын тоглолт Майамид 7-р сарын 14-нд Хард Рок цэнгэлдэх хүрээлэнд болох тул олон сэтгэл хөдөлгөм мөчүүд Америкчуудыг хүлээж байна. Клубүүдийн дэлхийн аварга шалгаруулах тэмцээн 2025 онд АНУ-д болно. 2026 онд АНУ, Канад, Мексикт гурван улсыг дамнан хөлбөмбөгийн дэлхийн аварга шалгаруулах тэмцээн зохиогдоно гэхчлэн Америкад хөлбөмбөгөөр амьсгалах болно. 

Энэ бүхнээс гадна тус улс 2027 онд эмэгтэйчүүдийн дараагийн дэлхийн аварга шалгаруулах тэмцээнийг зохион байгуулах магадлалтай байгаа тул энэ бүхний дараа АНУ-д хөлбөмбөг хөгжих нь тодорхой. Хөлбөмбөгийн ертөнц дэх хамгийн агуу тоглогч гэж олон хүн үздэг Месси Америкийн хөлбөмбөгийн дээд лигт ирсэн нь Америкийн спортын сэтгэл зүйд арилшгүй брэнд болж, Америкийн хөлбөмбөг, сагсан бөмбөг, бейсбол зэрэг багийн спорттой зэрэгцэн байр сууриа тогтоох болов уу гэсэн хүлээлт байна. Америкийн спортын шүтэн бишрэгчид дэмждэг багаасаа илүү шүтэн биширдэг нэг зүйл байдаг бол тэр нь тэдний төлөө тоглох супер оддын төлөөх хүсэл тэмүүлэл юм. Майкл Жордан, Том Брэди, Уэйн Гретцки гээд Америкчуудын хүндлэл, шүтээн болсон тоглогчид. Одоо Лионель Месси гэдэг нэрийг нэмэх шаардлагатай болж байна.

Лионель Месси байгаа цагт шинэ улиралд Интер Майамигийн тасалбарыг хямд суудалд оруулахгүй нь лавтай. Ирэх улирлын улирлын тасалбарын багцууд 2023 оныхоос хоёр дахин нэмэгдэж байгаа нь Интер Майамиг дэлхийн хамгийн тоглолтын борлуулалттай баг болгож байгаа аж. Ялангуяа дэлхийн дээд түвшний нэгд тооцогдохгүй лигийн хувьд энэ бол том үзүүлэлт.  Клубийн “Instagram” хаяг нэг сая дагагчаас 15 сая болтлоо өсчээ.  Мессигийн өмнөх, Интер Майами баг олон хоосон суудалтай цэнгэлдэх хүрээлэнтэй байсан бол түүнийг ирэхэд эрэлт хэрэгцээг хангах үүднээс нэмэлт тавиур суудлууд хүртэл барьжээ.

Одоо 58 акр талбай бүхий нийтийн цэцэрлэгт хүрээлэнд байрлах “Inter Miami CF” цэнгэлдэх хүрээлэнгийн барилгын ажил эхэлсэн бөгөөд 2025 онд ашиглалтад орохоор төлөвлөж байна. Багийн төсөв 60 сая доллараас 300 сая доллар болж, Интер Майами гэртээ болон зочлон тоглох бүрт тасалбар хэдхэн минутын дотор зарагддаг болсноор олон талын өгөөжөө клубт өгчээ.

Мессиг ирэхэд баг нь MLS-ийн хүснэгтийн доод хэсэгт унасан байв. Ирснээсээ хойш сар хүрэхгүй хугацааны дараа тэрбээр Лигийн цомын финалд Нэшвиллтэй тэнцэж, торгуулийн цохилтоор 10:9-ээр хожсоныхоо дараа клубийн анхны цомыг авчирсан. 

Цомын амжилтаар баяссан Месситэй Майами баг 12 тоглолт дараалан ялагдал хүлээлгүй плэй-оффын төлөөх тулаанд орж ирсэн. Мессигийн ачаалал нэмэгдсэнээр тэрбээр булчингийн бэртлээс болж, есдүгээр сар болон аравдугаар сарын эхээр зургаан тоглолт өнжихөд хүргэсэн. Тэрбээр нэг сар хагасын амралттай байгаа ч Месси эх орныхоо төлөөх шигшээ тоглолтуудад оролцоно. Олон хөлбөмбөг сонирхогчдын мөрөөдөл бол Месси 2026 оны дэлхийн аварга шалгаруулах тэмцээнд Аргентиний шигшээ багийн төлөө өрсөлдөх хэвээр байх явдал юм. 

Түүнийг анх Америкт ирэхэд нь супермаркетаар зочилж байгаа зураг цацагдаж байсан. Энэ нь цаашид боломжгүй, учир нь хүн бүр түүнийг хотод байгааг мэддэг болсон. Тэр ч байтугай хөлбөмбөгийг дагадаггүй хүмүүс хүртэл одоо Мессиг Америкад байгааг мэддэг болсон цаг. Түүний эхнэр Антонелла түүнийг Америкт суурьшихад нь тусалж, Майамигийн тухай, тухайлбал хооллох, цагийг өнгөрүүлэх хамгийн сайхан газар гэх мэт зүйлсийг олж мэдэхээс гадна талбайн гадна дүр төрхийг нь сайжруулахад тусалдаг. Улмаар Месси Америкт байгаагаа илэрхийлж, дэлхийд өөрийн байр сууриа олсон.

Үүгээр ч зогсохгүй Л.Месси Барсагийн хуучин багийн анд Жорди Альба, Серги Бускетс нартай эргэн нийлсэн бол Луис Суарес удахгүй тэдэнтэй нэгдэх нь гарцаагүй. Одоо Мессигийн дараагийн зорилго нь MLS-т Интер Майамигийн хамт аварга авах гэдэг нь гарцаагүй. 

1994 оны Дэлхийн аварга шалгаруулах тэмцээнийг эс тооцвол хөлбөмбөг хэзээ ч АНУ-д олон хүнийг хамрасан топ спорт байгаагүй. Харин Месси MLS-д ирсэн нь сүүлийн хэдэн арван жилийн хугацаанд энэ улсын спортын ертөнцөд гарсан хамгийн том хувьсгалуудын нэг болжээ. Энэ нь Бекхэм тус улсад ирсэн үеийнхээс хамаагүй том боловч Америкт хөлбөмбөгийг үнэхээр хөгжүүлэх эсэхийг цаг хугацаа харуулах болно.Эцсийн дүндээ Америкийн спорт сонирхогчид багаас илүү хувь хүнийг чухалчилдаг нь тоглолтыг АНУ-д хөгжих ёстой гэж үзэж байгаа хэмжээнд хүргэхэд хүндрэл учруулж болзошгүй юм.