Дэлхийн сагсан бөмбөгийн холбооны эмэгтэйчүүдийн Азийн аварга шалгаруулах тэмцээний B хэсгийн тоглолтууд энэ сарын 13-ны өдрөөс эхлэн Тайланд улсын Бангкок хотноо үргэлжилж байна. Манай эмэгтэй шигшээ багийн хувьд анх удаа FIBA-аас зохион байгуулж буй албан ёсны эрхийн тэмцээнд оролцож байгааг онцлууштай. Уг тэмцээнд нийт найман улсын баг тамирчид оролцсоноос манай шигшээ багийн хувьд хэсэгтээ Индонез, Иран, Малайз улсын шигшээ багуудтай оноолт таарсан.

Эхний тоглолт наймдугаар сарын 13-ны ням гарагт 11:00 цагаас Ким Пиеррэ-Луиз-ээр ахлуулсан Индонез улсын шигшээ багийн эсрэг хийж 69:52 онооны харьцаатай ялагдал хүлээсэн. Уг тоглолтод Б.Ариунцэцэг 9 оноо, 8 самбараар багаа тэргүүлж О.Хулан 8 оноо 8 самбараар багтаа туслалцаа үзүүлсэн ч багаараа ердөө 9 оновчтой дамжуулалт 19 бөмбөг алдалт хийсэн нь  уг тэмцээний тэргүүн байрт эрэмбэлэгдэж буй Индонезийн шигшээ багт хожигдох хангалттай шалтгаан болов.

Тэмцээний хоёр дахь тоглолт өчигдөр буюу 14-ний даваа гарагт 13:30 цагаас Азийн тэмцээнд хоёр дахь удаагаа оролцож буй Иран улсын шигшээ багийн эсрэг тоглосон. Эхний үеэс л манай багийн шидэлтүүд уналгүй бөмбөг алдалт ихтэй өрнөсөн ба энэ байдал нь удаан үргэлжилж эсрэг багт 11 удаа бөмбөгөө алдаж, 25 удаа бөмбөг алдалт хийж 33:70 харьцаатай ялагдал хүлээжээ. Тус тоглолтод Н.Нандинхүсэл 30 минутыг талбайд өнгөрүүлэхдээ 9 оноо 4 самбараас бөмбөг авалтаар багаа тэргүүлсэн байна.

Хоёр хожигдол хүлээсэн ч Малайзын шигшээ багийг хожсон тохиолдолд хэсгээсээ гуравдугаар байраар шалгарч тэмцээнийг цааш үргэлжлүүлэх боломжтой байсан ч өнөөдөр 13:30 цагаас болсон 40 минутын сагсан бөмбөгт 85:68-ын харьцаатайгаар ялагдал хүлээлээ. Эхний хагаст 24 оноогоор хожигдсон ч гуравдугаар үед Ариунцэцэг дараалж 8 оноо аван 10 оноонд тоглолтыг ойртуулсан ч Малайзын шигшээ багийн зургаан тоглогч 10 ба түүнээс дээш оноо авснаар манай эмэгтэйчүүдийн шигшээд боломж олгосонгүй. Б.Ариунцэцэг 22 минутыг талбайд өнгөрүүлэхдээ 14 оноо 10 самбар 3 оновчтой дамжуулалт, Н.Нандинхүсэл 28 минут тоглохдоо 10 оноо 4 самбар 7 оновчтой дамжуулалт гүйцэтгэсэн байна. Эмэгтэй шигшээ багийн хувьд 2014 оноос хойш олон улсын тэмцээнд дөрвөн      удаа л оролцож байсан ба энэ удаа Азийн аварга шалгаруулах тэмцээнд анх удаа оролцож чамгүй туршлага хуримтлуулсан биз ээ. Нэмж дурдахад манай шигшээ багийн дундаж нас 25 бөгөөд 1999 оноос хойш төрсөн 7 тоглогч байгаа нь цаашид амжилт гаргах нөөц боломж байгааг харуулж байна.   

С.Өсөхбаяр