Олимпын наадмын усанд сэлэлтийн сүүлчийн тэмцээн өчигдөр явагдаж дууслаа. Эрэгтэйчүүдийн 4х100 метрийн холимог буухиа төрөлд 1984 оноос хойш тасралтгүй олимпод аваргалсан АНУ-ын шигшээг Пан Жанлэ тэргүүтэй БНХАУ-ын тамирчид буулгаж авчээ.

БНХАУ-ын тамирчин Сюй Жяюй, Цинь Хайян, Сун Жяжун, Пан Жанлэ нар тус төрөлд 3:27.46 секундийн амжилтаар барианд орж, алтан медаль хүртлээ.

Америкийн Нэгдсэн Улс Райан Мерфи, Ник Финк, Кэлеб Дрессел, Хантер Армстронг нар тэдний араас 3:28.01 секундэд барианд орж мөнгөн медаль хүртэв. Тэдний араас Францын шигшээ багийн Йоханн Ндойе-Броуард, Леон Маршан, Максим Гроуссет, Флорен Манауду нар 3:28.38 амжилтаар хүрэл медаль хүртлээ.

Хятад болон АНУ-ын тамирчид болох Мерфи, Сю нар гараанаас тэргүүлж, араас нь Францын Ндойе-Броуард удаалж эхлэв. Мэлхий сэлэлтийн төрөлд шилжихэд 200м-ийн шинэхэн аварга Францын тамирчин Маршан алдагдсан хугацааг нөхсөн ч Их Британийн Адам Пити, Хятадын Цин нар Маршаныг гүйцэж, Хятад эргүүлэн тэргүүллээ авсан байна. Дараа нь Хятадын Сун Жяжун, Францын Гроуссет нар эрвээхэйгээр уралдахад, АНУ-ын багийн Дрессел чөлөөт сэлэлтийн төрөлд Францыг гүйцэж АНУ-ыг хоёрдугаар байрт авчрав. Сүүлийн уралдаан болох 50м-ийн зайнд БНХАУ-ын Пан Жанлэ 50 метрийн зайд хурдтай байж, АНУ, Францыг тэргүүлж алтан медалийн эзэн болжээ. 

Уралдааны дараа Пан Жанлэ орчуулагчаар дамжуулан “Энэ бол миний хувьд ид шид. Бид сайн багийг бүрдүүлсний хүчинд энэхүү амжилтыг гаргалаа” гэсэн бол Сюй Жяюй мөн үр дүндээ баярлаж, “Олимпын наадам миний хувьд үнэхээр гайхалтай болж байна. Маш их сэтгэл хангалуун байна” хэмээн хэлжээ.

Нөгөө талд энэ жил алтын буухиагаа алдсан АНУ-ын усанд сэлэгч Дрессел багаа төлөөлөн үг хэлэхдээ "АНУ-ын багийн хувьд үргэлж алт авах хүлээлт байдаг. Бид уламжлал ёсоор үүнийг л эрмэлздэг бөгөөд энэ нь олимпын ямар ч үед өөрчлөгдөхгүй гэж би бодож байна. Өнөөдрийн уралдаанд ойрхон өрсөлдлөө. Хятад дөрвөн гайхалтай сэлэгчдээ илгээсэн байна. Бид ч бас дөрвөн гайхалтай хуваагдалтай байсан. Гэхдээ өнөөдөр тэд илүү байлаа. Буухиа уралдаанд сална гэдэг хэцүү. Уралдах үед л энэ дарамт бидэнд мэдрэгдсэн” хэмээн хэлэхтэй зэрэгцэн малгайгаараа Хядатын тамирчид руу даллаж, “Тэд өнөө орой маш сайхан уралдаан зохион байгуулсан баярлаж байна" гэлээ.  

Маршан тэргүүтэй Францын усан сэлэлтийн тамирчдын олимпын наадамд үзүүлсэн гайхалтай амжилт энэхүү буухиа уралдаанаар өндөрлөлөө. Энэхүү хүрэл медаль нь Маршандын хувьд олимпын тав дахь медаль болж байгаа бөгөөд энэ нь бусад медальтай адил маш чухал медаль хэмээн тэр хэлэв. Ийнхүү олимпын наадмын томоохон төрлүүдийн нэг усан сэлэлтийн төрөлд энд хүрээд хөшгөө хааж байна.