Лос Анжелес Лэйкерс багаас энэ жил чөлөөт агент болоод буй Леброн Жэймсийг авч үлдэхийн тулд гурван жилийн 160 сая долларын санал тавихаар бэлтгэж байгаа талаар спортын олон эх сурвалжууд мэдээлж байна. Лэйкерсийн шинэ ахлах дасгалжуулагч Ж.Ж.Редикийг албан ёсоор зарласан хэвлэлийн бага хурлын үеэр олны анхаарал татсан хамгийн том шуугиан нь ESPN-ийн сэтгүүлч Дэйв Макменаминий мэдэгдсэн Лэйкерс Леброн Жэймст гурван жилийн гэрээ байгуулахад бэлэн байгаа гэсэн мэдээ байв. Хамгийн дээд гэрээний сунгалтыг 160 сая долларт барина гэжээ. 

Леброн Жэймс 6-р сарын 29 гэхэд одоогийн гэрээгээ дуусгах ёстой бөгөөд ирэх улиралд 51.4 сая долларын цалин өгөх байсан ч татгалзах боломжтой. Жэймс өдгөө 39 настай тул NBA-ийн 38-аас дээш насны тоглогчидтой хийх дүрмийн дагуу хамгийн дээд тал нь 3 жилийн гэрээ хийх боломжтой юм. Хэрвээ Лэйкерсийн саналыг Жэймс хүлээн зөвшөөрвөл 42 нас хүртлээ 24 жил NBA-д тоглох боломжтой. Мэдээж хамгийн ахмад, хамгийн өндөр цалинтай тоглогч болно. Дахин гурван жил NBA-д тоглоход түүний олон арван амжилтууд эвдэгдэхэд улам хэцүү болох биз ээ. Леброн Жэймс Лэйкерстээ үлдэх үү аль эсхүл шинэ багт нэгдэх үү гэсэн асуултын хариулт 6-р сарын 29 гэхэд тодорхой болно.