Дэрэн клубийн U10, U11, U14 насны 4 баг Европын 4 улсад тэмцээнд оролцож, U14 насны баг "Storsjocupen" тэмцээнээс хүрэл медаль хүртсэн амжилттайгаар өнөөдөр эх орондоо ирлээ. Дэрэн клубийн өсвөрийн тамирчид 06/27-08/08-ны өдрүүдэд Швед, Финлянд, Дани, Норвег улсын "Pitea Summer Games", "Storsjocupen", "Helsinki Cup", "Dana Cup", "Gothia Cup", "Norway Cup" гэсэн зургаан тэмцээнд оролцож, олон улсын хүүхдүүдтэй туршлага солилцлоо.

Дэрэн клубийн тамирчид байгуулагдсан 15 жилийн түүхэндээ Скандинавын орнуудад зохиогддог өсвөрийн хөлбөмбөгчдийн дэлхийн хамгийн том тэмцээнд тооцогддог тэмцээнүүдэд жил бүр тогтмол амжилттай оролцож ирсэн бөгөөд сүүлийн жилүүдэд тамирчдын амжилт улам өссөөр байна.

Сар гаруйн туршид улс дамжин тэмцээнээс тэмцээний хооронд сахилга бат, хичээл зүтгэлтгэйгээр оролцож, медалийн хур арвин, олон арвин туршлага хуримтлуулж ирсэн Монголын ирээдүй болсон өсвөрийн хөлбөмбөгчиддөө баяр хүргэж, амжилт хүсье.